Kalangsu 3

Kalangsu 3
Karangan Ki Dagar

Bagian 1
Isuk - isuk tara biasana langit lenglang, mega bodas katenjo silih udag kawas keur arulin ucing sumput pada baturna. Da biasana mah tiap isuk ge ngagebret hujan, tara kaliwat geus saminggu ieu mah. Usum ngijih keur memeumeujeuhna sabab geus nincak bulan ka dua welas.

Hiji lalaki kolot umur 60 taunan keur husu ngabengbrengkeun papakean baseuh pikeun di poe dina sasampayan , geus parantina di pojok kaler LP Sukamiskin mah, sangaja di jieun tempat pikeun moe baju para napi.

Di sagigireun eta kolot aya duaan anu sarua keur moekeun bajuna anu karak meunang nyeuseuh. Nu saurang sapantar sarua kolotna, nu hiji mah rada ngora paling kolot ge umur 40 taunan.

“Alhamdulillah nya kang, poe ieu mah di bere panas. Urang jadi bisa moe pakean.” Ceuk Nu kolot anu katelah Ki Mudasir. “Enya, mani geus kaluman make sarung lima poe teu ganti - ganti, keur sholat eta, keur hees eta. Asa ebat sholatna ge ari seug inget kana sarung nu di pake.” Kolot hijina ngajawab bari nyengir.

“Teu nanaon Kang Yat, ngarana ge keur warurat, lain di haja teu daek ganti, tapi emang euweuh deui alias kapaksa hehehehehe.” Ceuk Ki Mudasir milu nyerengeh, katembong huntu hareupna geus lemong. Lain coplok kusabab ku umur, tapi ropol sawaktu labuh, basa harita di udag kunu berwajib, da ngalakukeun kajahatan, nyaeta ngarampog di hiji imah soudagar beunghar.

“Bah Yayat mah karak ge sarung, kuring mah calana jero saminggu teu salin - salin, da asa kumaha, nya aratel, nya aranyeb, ari rek teu make calana jero da mani asa guntang gantung teuing si kusmin teh. Jeung asa kumaha we di sarung teu di calana jero, bisa - bisa asup angin Hahahahaha..” Nu ngora milu mairan, bari tuluy nyampaykeun calana jero nu meunang nyeuseuh terus di jepit sangkan teu murag katebak angin.

“Lain geus biasa tara di calana jero nyaneh mah Sarju !” Bah Yayat neuteup Sarju bari pura - pura kerung. “Ah si Abah mah, eta mah kabiasaan heubeul bah, sawaktu kuring masih boga pamajikan keneh, da ngarah gampang mun katarajang hayang ngeundeuk - ngeundeuk teh.” Sarju nyengir, tembong huntuna anu baradag koneng kandel ku ulam, kawas tas ngamomoy campoleh bae.

“Lain geus ngaropi acan ieu teh ?” Ceuk Ki Mudasir tumanya kanu duaan, bari ngucurkeun cai sesa dina ember, da geus beres manehna mah popoena teh. “Acan Ki.” Meh bareng Bah Yayat sarta Sarju ngajawab acan.

“Beres popoe urang ngawangkong bari ngopi dina bangku, ke ku kuring di jieunkeun heula kopina.” Ceuk Ki Mudasir bari ngaleos ka beh kidul, dimana pawon LP ayana, maksudna maeh rek nyieun kopi geusan tiluaneun.

Bah Yayat teh mangrupakeun tahanan heubeul di LP Sukamiskin, kasus narkoba sarta kasus maehan jalma anu jadi musabab Bah Yayat di hukum salawe taun. Ngeunaan lalakon Yayat atawa Alek nuju ngorana tiasa pamiarsa aos di buku kahiji sareng ka dua anu judulna #Kalangsu_1 sareng #Kalangsu_2

Bah Yayat jeung Sarju geus diuk dina bangku panjang teu jauh ti tempat moe pakean, teu lila kurunyung Ki Mudasir nanggeuy baki anu di eusi gelas cikopi satilu - tilu. Sok di simpen dina bangku, gap manehna nyokot sagelas, di tiupan sababaraha kali tuluy di siripit saeutik.

“Lain, rek ngajak ngawangkong naon ieu teh ki ?” Yayat panasaran sabab tara tisasari sobatna tepi ka daek ninyuhkeun kopi sagala, kawas aya sawalakeuneun anu daria. “Kieu Bah, urang duaan teh apan geus jadi pupuhu LP, akang RWna kuring RTna di blok C mah. Terusna urang teh akan jadi imam sarta khotib lamun jum’ahan. Tah si Sarju purah Adzana.” Ceuk Ki Mudasir tuluy ngaregot deui cikopina.

“Heueuh bener pisan, laju maksudna kumaha, akang mah acan pati ngarti ieu teh ?” Yayat kerung bari neuteup ka Ki Mudasir. “Kieu kang, sawaktu LP di kapalaan ku Pa Dimas, Nu sholat berjemaah teh rempeg, tiap waktu masjid sesek kunu sholat babarengan. Sabab pa Dimas mah ngutamakeun pisan kana sholat babarengan teh. Tah kiwari sanggeus di ganti ku Pa Romli, Nu sholat tambah corencang, malah subuh mah akan paling loba ge 7 urang, eta ge ka asup kuring, Akang sarta si Sarju.” Ceuk Ki Mudasir bari regot deui bae kana cikopina.

“Hehehehe Bener, bener pisan Ki, Kumaha atuh maksud aki teh ?” Sarju unggut - unggutan kawas nu gus paham tapi masih tumanya kumaha. “Nya urang tiluan kudu nyiar cara sangkan nu sholat berjemaah loba deui cara baheula.” Ceuk Ki Mudasir, tuluy ciciduh sabab kopi nu regotna kari dedekna.

“Kumaha atuh nya da hese ari maksa mah, da ari noelan sarta ngajak mayarakat LP hususna blok C mah akan tiap waktu.” Yayat ngajawab bari humandear kawas anu miceun bangbaluh. “Nya kang, kuring mah malah geus ngahadep ka kapala LP supaya di tegasan bari di contoan sholat babarengan.”, “Oh, kumaha ceunah ceuk kapala ?”, “Ukur heueuh bueuk da di laksanakeun mah heunteu geuning tepi ka kiwari.”

Sakedapan anu tiluan ngabaretem, ting haruleng kawas nu paralid dina jero lamunan sewang - sewangan. “Kuring boga ilham !” Ceuk Sarju, Jung nangtung tuluy ngaleos muru ka Masjid. Yayat sarta Ki Mudasir silih pelong, teu ngarti kana maksudna si Sarju nu ngadadak indit ka Masjid.

Yayat nguyup heula kopina nu geus rada tiis, Karak ge rek nangtung pikeun nuturkeun si Sarju. Di Masjid ngong kadenge anu Adzan, sorana teu bireuk sabab jelas sora Sarju anu biasa Adzan di masjid tiap poena.

“Aeh - aeh nanaonan ari si Sarju, Adzan lain wanci, maenya Adzan jam salapan isuk ?!” Ki Mudasir kaget gancang miheulaan leumpang muru ka Masjid, di satukangeunana Yayat nuturkeun bari sarua panasaranana jeung Ki Mudasir.

Isuk harita di LP Sukamiskin ibur, sabab aya nu adzan jam salapan isuk, aya nu nyangka Sarju muhit aliran sesat. Aya nu nyangka ngalindur, Aya oge nu nyangka heureuy, sabab Sarju katelah tukang heureuy bari rada lenger lamun geus kumatna datang.

Rata - rata sakabeh nu aya di LP mah paheula - heula muru ka Masjid, para sipir ge teu katinggaleun, pang tukangna Pa Romli kapala LP oge ngagandeang leumpang bari beuteungna mendeyang da budayut beurat ka hareup.

Jalma ngagimbung di latar Masjid, mani padedesek kawas nu lalajo tukang obat di pasar malem. Sanggeus cacap Adzana, Sarju kaluar ti Masjid, karak ge lol geus di sampakeun pananya ti loba Jalma, aya nu nganaha - naha, aya anu nyarekan, geus rupa - rupa omongan jalma anu harita hadir di latar pakarangan Masjid.

“Sarju kunaon maneh Adzan jam salapan isuk, ieu teh lain wanci, atawa maneh asup aliran anyar ?” Tanya Pa Romli anu maju ka hareup bari nulak cangkeng. “Hehehehe... Ning karumpul nya ari kuring Adzan wayah kieu mah. Bongana atuh pa tiap kuring Adzan nincak wanci tara aya anu daratang ka Masjid, paling ge ukur tujuhan, bari jeung eta deui - eta deui nu sholat berjemaah teh. Sok atuh kuring moal adzan cara tadi lamun pas kuring adzan nincak wanci sholat nu ha sejen haradir pikeun berjemaah kawas baheula.” Ceuk Sarju nyarita teu kirim - kirim hareupeun kapala LP.

Nu tadi raong nyararekan teh jep we jempe kawas gaang katincak, kituna mah ngarasa meureun geus lila tara ka Masjid. “Nya , nya kuring ngarti kahayang maneh Sarju, alus eta teh, geus ayeuna mah bubar, wayahna ka kabehan warga LP, semet ti ayeuna kudu daek sholat berjemaah ka masjid. Nu remen ka Masjid kuring bakal ngajukeun meunang remisi dua tikeleun tinu tara ka masjid.” Ceuk pa Romli sakalian biantara ka warga LP.

“Satuju...satuju pisan !” Raong nu hadir saur manuk ngajawab satuju tuluy keprok mani pa tarik - tarik, aya oge anu susuitan sagala rupa. “Hidup Sarju, Hidup, urang kabehan bakal meunang remisi dua tikel, bari masjid makmur deui, hidup sarju..” Ceuk salah saurang napi bari tuluy manggul Sarju di bawa ka lapangan.

Nu sejen nuturkeun bari surak eak - eakan. Bah Yayat katut Ki Mudasir mah ukur mesem, teu nyangka si Sarju boga ilham tepi ka belah dinya. Tulus saduana leumpang nuturkeun anu lobaan.

Bagian ka 2

Hujan ngaririncik ti sore mula, hawa di kota Bandung tambah karasa nyecepna. Jam dingding di masjid LP Sukamiskin nunjukeun pukul 8 liwat saparapat. Di jero masjid kari tiluan nyaeta ki Mudasir, Bah Yayat, sarta Sarju.

Basa wanci isya mah masjid teh pinuh kunu sholat berjamaah. Saprak kajadian kaheuleutanana dimana Sarju adzan jam salapan isuk di tambah ku janji pa Romli yen sing saha nu remen sholat ka masjid bakal di ajukeun remisi dua tikeleun, Masjid teh pinuh bae, nu sholat tepi ka emperan masjid, aya oge nu di pakarangan bari ngampar samak.

Bada isya nu sejen mah nuntutan marulang ka selna masing - masing, tepi ka ngan ukur nyesa tiluan. “Bah, Aki, kuring teh rek menta hampura ka abah sareng aki, bari sakalian bade amitan.” Ceuk Sarju ngamimitian muka obrolan.

“Nya di hampura pisan, Abah ge sarua menta hampura sabab rumasa remen pisan ngaheureuyan ka ilaing teh Ju. ngan palebah amitan, naha rek kamana kitu ju ?” tembal Yayat bari ngarubah silana jadi sila tutug, ngarasa tiris banguna mah.

“Apan si Sarju mah dua poe deui ge babas Kang ! geus cacap hukumana tepi ka poe pageto.” Ki Mudasir anu pangjawabkeun teh. Sarju mah ukur unggeuk, ngaenyakeun caritaan Ki Mudasir.

“Kutan kitu ? Heueuh sukur atuh Ju ari ilaing pageto bebas mah. Ulah poho ka sobat anu di LP lamun seug kahareupna meunang kabagjaan, hirup makmur kawas batur.” Ceuk Yayat bari neuteup ka Sarju.

“Moal atuh Bah, kuring mah bakal inget bae ka sobat saperjuangan mah, komo ka Abah sareng aki mah.”, “Nya kami duaan milu bungah sakaligus bakal leungiteun, sabab mun ilaing euweuh moal aya nu purah banyol, purah di heureuyan ku kami.” Ki Mudasir nurutan rubah silana.

“Hayu ngarampih ah, ke kaburu sipir nguriling, ka buru di konci mah bahaya euy !” Bah Yayat ngajak mulang ka sel, sabab mun peuting sipir nguriling ngaroris tahanan bari ngoncian sel. Nu tiluan narangtung, terus leumpang babarengan muru ka selna sewang - sewangan.

Teu lila hujan ngagebret turun mani kerep kawas meunang nyicikeun ti langit. Kaayaan di jero LP sepi jempling, kanca wargana geus ngaranjang ka alam impian, ukur lampu blor anu terus nguriling nyorotan sakuliah wewengkon LP. Nitenan bisi bae aya napi anu kabur.

Bener bae dua poe ti harita Sarju bebas, Sarju nyalaman sakabeh warga blok C, amitan bari silih du’akeun. Meh ampir kabeh nineung ka Sarju teh. Najan sapopoena purah banyol tapi jelemana mah bener sarta bela ka babaturan.

Gancangna carita. 3 Desember taun 2013 ka sorang. Poe harita, Poe anu penting pikeun bah Yayat, sabab nya poe harita bah Yayat bisa nyeuseup deui hawa kabebasan. Sanggeus puluhan taun narima hukuman di pangberokan.

Diiring du’a sobat - sobatna sarta di jajap ku cipanon ki Mudasir anu leungiteun sobatna, Yayat ngalengkah kaluar ti LP Sukamiskin. Aya bungah aya bingung Yayat bebas teh, bungahna ngarana jalma sakumaha di bebetah ge ari di kurung bae mah pasti hayang bebas da lain hayam atawa manuk. Ari bingungna, nya kudu kamana atuh balik teh. Ka Kebon cau ? emang aya imah ruruntuk ti indungna, tapi meureun di tinggalkeun puluhan taun mah imah teh geus runtuh, dina masih nangtungna ge pasti geus teu walagri sabab taya anu ngurusna.

Yayat leumpang sakaparan - paran, nuturkeun indung sukuna mapay jalan gede ka kidulkeun. Srog ka parapatan jalan Leuwi panjang. Bari ngalamun yayat meuntasan jalan. Cekiiiiit...!! hiji motor matic ngerem ngadadak sabab nempo aki - aki anu meuntas jalan bari teu luak - lieuk, meh bae yayat ka tabrak ku eta motor lamun seug nu nyupiranana teu tapis ngabanting stir.

Reug motor eureun pinggir jalan, nu numpakna turun tuluy nyampeurkeun ka Yayat anu masih colohok bengong reuwas ka reureuhnakeun. “Bah Yayat...ieu teh leres bah yayat ?” eta lalaki kalah tumanya ka Yayat bangun nu kenal.

“Euh euh leres, ke ari ieu saha ?” Yayat rungah ringeuh sabab si lalaki teh masih di helm buni teu kaciri beungeutna. “Uing Sarju Ki !” Ceuk eta lalaki bari muka helmna, bener we Sarju anu di hareupeun bah yayat teh.

Sarju kiwari mah seseg awakna, beuteungna rada budayut, beungeutna bersih, pakeana oge necis, leungeuna rembel ku batu ali, dina dadana oge ngagantung kalung anu liontina tina batu ali warna warni, ngan angger pas seuri mah huntuna masih katembong koneng. “Geuning ilaing Ju.” Yayat bungah kacida panggih jeung Sarju teh sabab sasat keur mobok manggih gorowong. Keur bingung jol datang batur.

“Muhun bah, bade kamana abah teh? na iraha bebas ti LP bah ?” Tanya sarju bari nyalaman ka Yayat. “Tadi isuk kaluar mah Ju, puguh keur bingung abah teh, sabab taya tuturkeuneun, teuing rek kamana ? ukur nuturkeun indung suku we ju.” Jawab Yayat bari semu ngalengis.

“Tos atuh bah milu jeung uing we, hayu numpak kana motor . ngobrol mah urang teruskeun di tempat uing dagang. “ Sarju ngajakan Yayat sangkan milu jeung manehna, kituna teh bari leungeuna nyokot tas cangklek kucel bogana yayat anu ragrag sabab reuwas ku sora motor.

“Nuhun atuh Ju.”, “Nya ulah sungkan - sungkan jeung uing mah bah, anggap we alo sorangan.” Yayat unggeuk tuluy nuturkeun Sarju numpak ka motorna. Diuk di satukangeun Sarju. Motor di starter. Derenden hirup tuluy ngageleyeng maju lalaunan.

Bagian 3
Teu kacatur di jalanan, motor nu di tumpakan ku Sarju sarta Bah Yayat geus tepi ka jalan pungkur Kebon Kalapa. Sapanjang jalan ngajajar tukang batu ali, kaayaan rame kacida sabab ratusan jalma pabuis di eta patempatan. Aya nu ngilikan batu ali, aya nu keur milihan bahan batuna, aya nu keur adu harga, aya anu ngongkrong bari nungguan batuna anu keur di asah. Aya oge anu keur ngawangkong bari silih tembongkeun koleksi batu alina.

Mangsa harita memang keur meumeujeuhna usum batu ali, meh tiap kota sa nusantara mah kabeh keur kakeunaan ‘demam’ batu ali. Jalan pungkur salah sahijina tempat jualan batu ali kelas kaki lima, da ari sentrana mah ayana di ITC Kebon Kalapa, Mall husus pikeun nu dagang batu ali di kota Bandung.

Reg motor matic pulas hideung teh eureun di salah sahiji jongko batu ali anu di tutupan ku terpal. Jrut Sarju jeung Yayat tarurun, Sarju mah markirkeun motorna sangkan mernah teu ngahalangan nu lalar liwat. Beres markirkeun motorna, sarju nilepan terpal anu nutupan jongkona.

“Ju ieu teh jongko ilaing ?” Tanya Bah Yayat bari palahak polohok, hookeun ku ramena eta tempat. “Enya Bah, nu kuring, kadieu bah calik di dieu !” Tembal Sarju bari mernahkeun bangku panjang anu tadina di simpen satukangeun jongko.

“Lain Ju mani rame kieu ning nu dagang sarta nu meuli teh ? naha jalma ayeuna teh kabehna resep kana batu ali kitu ?” Bah Yayat masih ngarasa heran, sabab di jaman manehna ngora mah, nu make batu ali teh ukur aki - aki, ari kiwari nenjo nu milihan batu mani campur aya awewe, lalaki, kolot, budak, kabeh sibuk milihan batu ali, teu sirikna kawas nu lomba agustusan.

“Bah Jaman kiwari jeung jaman abah baheula mah beda pisan, kiwari mah mun teu make batu cincin atawa batu ali di sebut jalma teu gaul, teu ‘kekinian’. Kadang ku pada baturna sok di ilikan mun panggih teh, ramona, sok di gonjak, eta teh leungeun atawa suku ceunah, da mun leungeun mah aya batu alian.” Ceuk Sarju bari nyengir. katembong deui huntuna anu koneng kawas batu campaka.

“Kutan kitu Ju ? Beu naek daun atuh batu ali teh ning nya ?” Bah Yayat gogodeg teu nyangka sacongo buuk perdagangan batu ali tepi ka sareme kitu. Muhun Bah, Jang Cikopi dua, kupat tahuna ge dua, nu hiji tong di togean !” Sarju nyorowok ka tukang cikopi anu parendeng dagangna jeung tukang kupat tahu. Tukang cikopi jeung tukang kupat tahu unggeuk, tuluy laladang, nyiapkeun pesenan Sarju.

Keur kitu burudul jalma nu rek balanja batu ngagimbung dagangan Sarju. Aya nu milihan watang, aya nu milihan batu ali, aya oge anu milihan batu bahana. Da Sarju mah dagang teh kawilang lengkep, ti mimiti batu anu masih bahan, batu jadi, watang batu, sarta bubuk inten pikeun ngasah batu ge aya, teu tingalen jasa ngabentuk batu mah, dua mesin gurinda ngajugrug sisieun jongko.

“Mang aya batu Lavender mang ?” Saurang jajaka nanyakeun batu nu keur di teanganana. “Nu bahan atawa anu geus jadi Jang ?” Sarju malik nanya. “Ari nu bahan sabaraha, nu jadi sabaraha hargana Mang ?” Si Jajaka tumanya deui.

“Nu bahan mah ukur 40 rebu sapotongna, tuh di paso warna hejo. lamun anu geus kinclong mah kari masang hargana ti mimiti 100 rebu tepi ka 300 rebu kumaha kwalitas jeung gedena batu. Tah ieu batuna, Ceuk sarju bari mukakeun cepuk wadah batu, katempo batu warna ungu ti mimiti anu sagede pincian tepi kanu sagede kaleci gabom.”

“Ah nu geus jadi we mang, Ngagosok mah kuring teu bisa.” Ceuk Si jajaka bari ngilikan batu dina cepuk. “Nya sok tah milih heula nu mana ?” Ceuk Sarju bari ngasongkeun cepuk. Mang aya watang titanium teu ?” Hiji lalaki tengah tuwuh di kameja bodas nanyakeun watang batu ali tina bahan titanium. “Aya pa, ieu palih dieu.” Tembal Sarju bari nunjuk ka tempat watang kencaeun jongko. Si lalaki ngised seseledek ka belah kenca tuluy milihan watang anu sakirana cop kana hatena.

Anu balanja terus merul teu eureun - eureun kawas nu ngantri tiket karetaapi dina wanci deukeut ka lebaran. Sarju lumayan ripuheun, Yayat ge turun mantuan sabisa - bisa, da karunyaeun ka Sarju, jaba era lamun ukur nempokeun bae.

Wanci lohor nu datang rada corengcang ukur hiji dua eta ge ngan ukur ngilikan atawa tatanya ngeunaan batu. Cikopi jeung kupat tahu geus lenang katutuh ku lapar bakat cape laladang. Sarju jeung Yayat diuk dina bangku bari nginum teh botol tiis.

“Ju, sorangan jadi ahli batu kitu, meunang guguru ti saha ?” Tanya Bah Yayat ka Sarju anu keur nyuruput teh botolna. “Ah tetelepek we bah, mimitina mah kuring kaluar ti pangberokan teh panggih jeung babaturan heubeul, tuh Si Samad anu jongkona di terpalan warna beureum. Tah kuring milu heula bari di ajar kana batu ka manehna, geus bisa kuring muka sorangan.” Tembal Sarju bari curukna bentik nunjuk jongko baturna anu aya terpal beureum luhur jongkona.

“Oh kitu, Abah ge kabita Ju hayang bisa kana batu ali teh.” Yayat terus terang ka Sarju, sabab hatena kapincut nempo Sarju anu laladang batu tepi ka teu eureun - eureun. Duit tepi ka mewel dina tas cangklekna.

“Sok bae bah, milu we jeung kuring heula, tuh da mesin gurindana ge aya dua, hiji pake ku abah, hasil na sok keur abah, ngapalkeun ngaran batu mah ke ge nuturkeun sorangan kacangkem kabeh bah ku remen nongkrong di dieu mah. Sare mah bareng we di kontrakan kuring bah da lalega, kuring ge ukur sorangan.” Ceuk Sarju ngadukung kana kahayang Yayat.

“Nuhun pisan Ju.” Bah Yayat nyuruput es tehna, ari Sarju mah ka hareup deui sabab aya mobil sedan eureun hareupeun jongko. Saurang awewe geulis turun tina mobil, tuluy teu era - era langsung milihan batu ali anu ngaderes meunang majang Sarju.

“Mang ieu batu naon ?” Si Wanoja nanya ka Sarju. “Oh eta mah topaz.” Ceuk Sarju. “Pami nu ieu sareng nu eta ?” Si wanoja tutunjuk ka batu warna beureum sarta warna biru ngora. “Nu eta mah yaman sareng Widuri bulan teh.” Ceuk Sarju deui.

“Pami anu cocok sareng istri di antara anu tilu eta anu mana nya ?”, “Anu cocok kangge istri mah widuri bulan teh ?”. “Nya atuh abdi nyandak nu widuri we, pangaosna sabaraha mang ?”, “Mirah mung sajuta satengah teh.”, “Ulah awis teuing sajuta we atuh nya.”, “Teu can tiasa teh, paling sajuta saparapat we.”, “Mani ngagok atuh mang. lempeng we atuh meh janten langganan.”, “Muhun atuh mangga ari bade ngalanggan ka abdi mah.” Ceuk sarju bari ngasongkeun batu Widuri ka si wanoja.

Si Wanoja nampanan eta batu, sup kana dompetna, tuluy creng mayar duitna ku 10 lambar saratus rebuan. “Nuhun nya mang.” Ceuk Si Wanoja saterusna asup ka mobilna. Mobil di starter derenden maju lalaunan.

“Ju geus wanci lohor euy, hayu sholat !” Yayat ngajakan sholat ka Sarju. “Abah we ti heula, deukeut terminal aya mushola mapay jalan ieu we ke ngenca di parapatan. “Ju, ilaing teh muadzin Ju, naha ngalengle - lengle sholat ning ayeuna mah ?!” Bah Yayat rada heran nempo Sarju kiwari. “Kagok bah dagang keur haneuteun, lebar mun di tinggalkeun.” Tembal sarju bari beberes dagangana anu rada acak - acakan balas anu milihan.

Ahirna mah Yayat ngoloyong sorangan nuturkeun panunjuk Sarju, mapay jalan gede, bras ka parapatan, leok ngenca nuju ka arah terminal kebon kalapa.

Bagian 4

Ti Saprak harita Bah Yayat milu nganjrek di imah kontrakana Sarju. Saban Poe Yayat di ajar ngabentuk batu ali, moles sarta masang batu kana watangna. Ti minggu ka minggu bulan ka bulan, teu karasa geus meunang tilu bulana Yayat milu jeung Sarju.

Kana moles batuna geus mahir, apal kana sagala bentuk sarta macemna batu ali. Sapopoena lumayan mujekil hasil tina moles batu teh. Tina hiji batu anu di bentuk sarta di poles tepi ka herang teh Yayat meunang upah 30 rebu rupiah. Dina Sapoe rata - rata aya bae 30 batu mah anu di bentuk, malah mun malam minggu sarta poe minggu mah sok tepi kana 50 siki batu anu hayang di poles teh.

Puguh we Yayat gumbira naker, meunang kasab anu hasilna onjoy ti batur. Sapopoena teu kurang ti 800 rebu dirina nyakuan bati teh. Da nu saratus mah di pake dahar sarta mayar listrik. Hiji mangsa Yayat geus kukumpul modal sabab manehna hayang muka jongko batu sorangan. Bari ngahareupan cikopi di tepas imah kontrakan, peuting harita Yayat balaka ka Sarju.

“Ju, Abah teh nganuhunkeun pisan ka Sarju. Kahijina geus di ampihan di dieu, kaduana geus di ajarkeun elmu ngeunaan batu ali sarta ngabentukna. Tah teu aya maksud nu lain Abah teh hayang cara Sarju boga jongko sorangan. Kumaha ceuk Sarju ?” Bah yayat coba neuleuman hatena Sarju, bisi bae ka singgung atawa teu panuju kana paniatanana.

“Ih tos sakedahna Bah, akan di LP ge abdi teh sering di tulungan ku Abah, komo basa harita rek di garebugan ku genk-na si Rewok mah, akan pami teu aya Aba mah, tiwas sigana kuring teh. Tah kuring mah satuju pisan Bah kana paniatan Abah teh, da kudu kitu bah supaya maju mah. Tos gaduh sabaraha kitu modalna Bah ?” Ceuk Sarju nyaluyuan kana kahayang Yayat.

“Karak boga 10 juta Ju. Cukup moal nya Ju ?”, “Moal bah sakitu mah ukur meunang watang titanium 12 kodi atuh, sakurang - kurangna oge 30 juta Bah. Atawa kieu we atuh, abah usahakeun boga 20 juta, tah kurangna mah nyokot barang ti kuring, bayarna mah ku maha abah we, teu kudu gurung gusuh.”

“Nya nuhun atuh Ju ari kitu mah, ngan bae Abah rek ka Cimahi heula sababaraha poe mah rek nyiar modal, da boga warisan imah di Cimahi teh, susuganan can rubuh imahna jadi bisa di jual atawa di boreuhkeun ka Bank.” Ceuk bah Yayat, inget ka imah warisan ti indungna anu aya di Kebon Cau.

“Teu nanaon bah mangga bae, ngan kuring panasaran Abah rek dagang batu ali di mana akan di pungkur mah tos teu aya anu lowong Bah ?” Tanya Sarju panasaran. “Rek nyobaan di lembur Abah, ka Cimahi teh salian ti nempo imah bari nyiar lokasi anu hade pikeun dagang batu ali Ju.” Tembal Yayat tuluy ngodomang kana gelas kopina, di tiupan sakeudeung, laju di suruput lalaunan bangun nikmat naker.

“Oh kitu bah, nya atuh di du’akeun ku kuring sing hasil bah, tah mun geus hasil gancang kadieu deui, urang balanja babarengan ka Bekasi.” Ceuk Sarju bari nurutan nyuruput cikopina.

“Naha balanja teh ka bakasi kitu Ju ?” , “Muhun Bah di Rawa bening Jatinagara, di dinya aya pasar batu ali pang gedena sa asia. Sagala batu ti nusantara oge ti luar nagreg eh ti luar negri kabeh aya di dinya mah. pon kitu deui alat moles, watang, obat gosok sarta nu lain - laina kumplit didinya mah bah kari milihan.” Ceuk Sarju bari pepeta di tungtungan ku nyengir nembongkeun huntuna nu koneng kawas batu campaka.

“Oh kitu Ju, nya atuh ke Abah mun geus hasil ge nelpon ka Sarju apan geus boga Hp ayeuna mah Ju.” jawab Yayat bari ngaluarkeun HP Samsung Young kaluaran pang anyarna harita mah, tuluy ngageser - geser layarna nempoan poto rupa - rupa batu ali anu ngahaja di simpen ku yayat pikeun manehna ngapalkeun.

Saterusna mah obrolan teh ngaler - ngidul sagala di caritakeun, muka luang jeung pangalaman masing - masing, pangpangna Sarju anu ngadongengkeun lalakona ti saprak ka luar ti pangberokan.

Isukna, sanggeus amitan ka Sarju, kencling bae Yayat indit. Leumpang ngagandeang pinuh ku harepan, srog ka jalan gede. Yayat gugupay, reg angkot warna hejo jurusan Cimahi Kebon kalapa eureun hareupeun Yayat. Yayat naek kana angkot, dius angkot maju deui ngambah jalan aspal.

Teu kacatur di jalana, angkot geus tepi ka pasar antri baru Cimahi. Jrut Yayat turun, song ngasongkeun ongkos kana supir, supir mulangan, pamulangan ku Yayat di tampanan. Yayat leumpang salse mapay jalan Gandawijaya nuju ka lembur Kebon Cau.

Sapanjang jalan ingetanana rus ras ka mangsa anu ka tukang, puluhan taun kakarak harita nincak deui ka Cimahi, kota leutik anu resik banjar karang pamidangan. Lembur tempat kalahiran, anu pinuh pisan ku lalakon.

Kabayang deui rurupaan indungna nyaeta Bi Tonah, Mbok Darmi, Ustad Tatang, Ningrum, Nyi Onah, Nyi Usniah, sarta Kosim. “Eum hampura ema, hampura Nyai, ukur nyieun dosa aing teh ka maranehna. Duh Ema sing tentrem di alam barzah Ma, hapunten Yayat anu tara ngadangu papatah Ema, hirup ukur kalangsu ku hawa nafsu.”

Kolebat beungeut almarhumah Ningrum nembongan, cinta munggaran oge pamajikan anu kadua sanggeus Nyi Onah pikeun Yayat, anu maot alatan kahuruan sabab Yayat muhit ka Siluman.” Deudeuh teuing Nyai, Arum teh tepi ka hanteuna alatan kasalahan akang anu leuwih beurat ka siluman ti batan pamajikan sorangan. Hampura dosa akng Nyai.” Yayat sasambat dina jero hatena, pipikirana ngacacang ka mangsa katukang.

Kolebat deu rurupaan Nyi Usniah pamajikana anu katilu Yayat. “Hampura Akang Usniah, akang anu geus tega ngagadekeun anjeun alatan judi qiu - qiu. Hiji waktu akang bakal menta hampura ka anjeun Nyai.”

Kusabab leumpangna bari ngacacang kamana mendi Yayat teu awas kana jajalaneun. Jedak manehna patubruk jeung hiji pamuda. “Aduh, eh aki - aki teh leumpang nyurudug bae teu make panon !” Ceuk eta jajaka bari ngusapan tarangna anu ti dagor kana tarangna Yayat.

Eta jajaka teh dedegana meh sarimbag jeung Yayat, jangkungna, begangna, ngan beungeutna mah teu mirip Yayat, kulitna bodas, buukna panjang sataktak bari ngarerewig teu ka urus. Si jajaka nyampeurkeun ka Yayat, leungeuna nyekel kana kerah bajuna Yayat. “Aki ! lamun leumpang ulah bari ngalamun, tuh tarang batur jadi bencenur. hayoh kuring menta ganti rugi !” Si Jajaka hahaok bari tina sungutna nyelebreng bau AO, kawasna mah pamuda baragajul purah nginum.

Yayat ukur olohok neuteup kana beungeut si Jajaka. “Naon siah kalah molotot, wani ka aing !” Ceuk Si Jajaka bari ngamang - ngamang peureupna. Yayat ngusiwel nyokot duit pamulangan angkot tina saku bajuna, song di bikeun ka si Jajaka.

Si jajaka ngaleos sanggeus narima duit pamere Yayat, Yayat mah masih ngahuleng. Lain ngahuleng bakat ku sieun di gebugan ku si jajaka, tapi bakat ku reuwas sabab nenjo keureutan beungeut si Jajaka anu nyeples pisan jeung Nyi Usniah, urut pamajikanana.

“Boa - boa, tapi da harita waktu indit teh, Usniah heunteu keur bureuyeung, ah ukur mirip we meureun.” Yayat galecok sorangan dina jero hatena, sukuna ngalengkah deui mapay jalan Gandawijaya. Sawatara menit ka liwat, Yayat ngaleok ka kenca asup kana gang anu brasna ka lembur Kebon Cau.

Bagian 5

Leok Yayat mengkol ka kenca ngambah gang anu brasna ka lembur Kebon Cau, meunang sawatara menit jog anjog ka hareupeun imahna. Yayat ngagebeg aya reuwas, aya heran, sabab imah teh kaayaanana teu kawas anu di bayangkeun ku dirina.

Yayat mah ngabayang teh imah geus rubuh sabab puluhan taun teu di urus, dina masih nangtungna ge pasti wangunana teu walagri, kentengna paburisat, tembokna ngagareblag, kusen mah pasti geus ancur di hakan rinyuh.

Tapi nu nyampak dina panenjo Yayat jauh pisan tina sangkaan. Imah titinggal Bi Tonah indungna Yayat teh masih cara baheula, masih resik najan imah kolot, malah kawas aya nu ngurus da buruan barareusih, sarta cetna ge anyar, malah mah kawas anu kakarak pisan di cet.

Panto hareup muka, kadenge di jero imah kawas aya jalma anu keur baranggawe, sabab sorana kadenge kesrak - kesrek siga nu keur beberesih. “boa - boa imah teh aya nu ngajual, atawa aya anu wani nyicingan ?” Gerentes hate yayat.

Yayat ngalengkah ngadeukeutan kana panto imah tuluy pok uluk salam, “Assalamu’alaikum, punten.” Ti jero teu aya jawaban, nu kesrak - kesrek masih kadenge. “Assalamu’alaikum, sampurasun !” Yayat rada bedas uluk salamna supaya kadengeeun ku jalma anu di jero imah.

“Wa’alaikumsalam !” Aya nu ngajawab ti jero imah. Teu lila kadenge jalma anu leumpang ti jero imah muru ka deukeut panto. Hiji lalaki tengah tuwuh kaluar tina panto, Srog pa amprok pisan jeung Yayat.

Sakedapan mah silih teuteup, bari nginget - nginget. “Aduh ! ieu teh Juragan Yayat, abdi Kosim juragan.” Ceuk eta lalaki bari teu antaparah deui ngagabrug ka Yayat. Sihoreng mah eta lalaki teh Kosim, urut pagawena Yayat tea sawaktu Yayat keur jadi jalma jegud waktu harita.

Ngeunaan Kosim, Ningrum, Bi Tonah, Ustad Tatang, Nyi Usniah sareng nu sanesna tiasa di aos di buku kalangsu jilid 1 sareng 2, anu parantos di terbitkeun boh dina buku pisik atanapi anu bentuk buku elektronikna. Tiasa di download oge di group Tepas Sunda atanapi di Blog Tepasunda.

“Bagja Sim urang teh masih bisa patepung deui.” Ceuk yayat bari nepakan tonggong urut badegana. “Hayu kalebet Juragan, urang ngobrolna di lebet, apan ieu teh bumi juragan.” Ceuk Kosim bari metot Yayat di bawa ka jero imah.

“Sakedap juragan urang ngadamel kopi heula, kaleresan abdi teh nuju ngecet, termos sareng gelasna mah nyandak ti rorompok.” Kosim geuwat ninyuh kopi, Kopi karesep Yayat nyaeta kopi cap kapal teuleum. anu ngahaja mawa ti imahna.

Yayat mah ulak - ilik nempoan imah, bener we imah teh weuteuh, malah ngaalusan sabab lalangitna ge, enternitna anyar ngaganti, handapna nu baheula tehel di ganti ku kramik warna bodas, kusen jandela sabagean mah anyar. Pon kitu deui cetna, karak sawareh da Kosim can anggeus migawena.

Beres nyieun kopi sor Kosim nyuguhkeun kopi ka Yayat. Gek duanana dariuk di tengah imah. Korsi teh masih nu baheula, ngan bae kulit jokna anyar ngaganti. “Sim geuning imah teh di rawat ku Kosim, naha di cicingan ku Kosim atawa kumaha ?” Yayat mimiti cumarita.

“Hapunten pisan juragan, bilih abdi kumawantun sareng aya dina jalan anu lepat. Saprak juragan ngiles teras kabarna lebet ka LP teh, dua taun mah bumi teh teu aya nu mirosea, kentengna balalocor, teras bilik anu di dapur mah aya anu ngageblag sagala. Nya abdi teh kumawantun, kajurung ku nyaah ka ieu bumi, margi hebel abdi nu sok katitipan ieu bumi ku juragan, sawaktos juragan linggih di perumahan Pasar atas tea.”

“Bumi teh satiasa - tiasa di leresan ku abdi, terasna di sewakeun ku abdi teh, maksadna mah supados aya anu ngurus, da pami di suwungkeun mah sok gampil reksak bumi teh, terasna supados aya waragad kangge miarana.”

“Tah sesa artosna ku abdi teu di coceng juragan, tapi di tabung, di kempelkeun, bilih sawaktos - waktos juragan uih ka dieu. Terasna sawarehna oge sok di suhunkeun Ku Nyi Usniah, tilas bojo juragan tea. Janten aya sesa artos teh 1o juta rupiah di tabungkeun di bank ku abdi Juragan.”

Kosim panjang lebar nerangkeun ngeunaan imah Yayat, anu geuningan mah di urus ku Kosim, salila Yayat aya di pangberokan teh. Yayat unggut - unggutan, bungah campur ka gagas ku kalakuan Kosim. Hiji - hijna pagawe anu satia, sanajan pernah di sebakeun ku di rina ka Nyi Gedeng Suro, siluman Buta hejo anu di pernah di puhitna. (ngeunaan Nyi Gedeng Suro sarta lalakon Yayat munjung tiasa di guar di jilid kalangsu anu kahiji.)

“Juragan henteu bendu kan ?” Ceuk Kosim rada sieun nempo yayat ukur unggut - unggutan teh. “Ih heunteu Sim, henteu pisan. Malah sabalikna Kuring teh nganuhunkeun pisan, Kosim geus boga inisiatif ngarawat ieu imah titinggal kolot kuring. “

“Lain, ari nu ngontrak masih keneh ?” Tanya Yayat bari nyuruput kopina, lumayan seger tikorona kabanjur cikopi, sanggeus tadi nikreuh leumpang ti Pasar antri. “Tos beres nu ngontrak mah juragan, tos ti minggon kamari ngalih, janten abdi laluasa ngecet ieu bumi, bari ngalereskeun kenteng anu ngagolosor ku angin.” Tembal Kosim, hatena lugina, sabab Yayat teu ambek malah katingalina panuju pisan kana tindakan manehna.

“Ulah nyebut juragan atuh Sim, asa teu pantes da ayeuna mah kuring teh jalma biasa, sebut we yayat atawa akang, meh rada mernah kadengena.” Ceuk Yayat deui. “Sumuhun Jur eh kang.” Kosim teu wanieun ari nyebut ngaran mah, antukna ngaakangkeun ka Yayat.

“Lain ari tadi nyebut Nyi Usniah sok menta duit, kumaha lalakona Sim ?” Yayat asa ka ingetan ka Nyi Usniah, ras deui manehna inget ka pamuda anu tadi patubruk di jalan, anu keretan beungeuta nyeples Nyi Usniah.

“Apan Nyi Usniah teh sawaktos pundung tea uih ka bumina geuning nuju kakandungan kang, saurna mah tos dua sasih ngandegna teh, tah ayeuna tos gaduh putra pameget kasep, dedegana persis akang, mung keretanana mirip ka ibuna. Tah artos sewaan bumi teh di anggo kangge waragad lahiran sarta biaya murangkalih Akang, ti mimiti sakola tug dugi ka lulusna SMK.”

Nyi Usniah teh masih gaduheun hak Kang kana ieu bumi numutkeun pa Ustad Tatang mah, margi sawaktos Akang ngiles teh anjeuna apan teu acan kungsi di pirak ku akang teh, mung sakedar lisana Nyi Usniah, nyuhunkeun di talak, eta oge nyariosna nuju kalimpudan ku amarah, margi kadieuna mah teu kungsi deui ngembet - ngembet kana hal eta. malah kawasna hanjakaleun ku kekecapanana teh, margi buktosna mah akan akang teh tepi ka males pati ka jalma - jalma anu bade ngagadabah ka dirina.” Ceuk Kosim, gap kana cikopina sabab tihorona karasa garing.

“Baruk kuring teh boga budak nya Sim. Bener pisan memang acan resmi di talak pamajikan kuring teh, sabab harita ge kuring teu nyaluyuan kana kahayangna. Saha ngaran budak kuring teh Sim ?” ceuk yayat ngarasa panasaran. “Namina Asep Baryat Kang.”Jawab kosim terus nunda gelasna anu koredas kari dedekna.

Bagian 6

Sanggeus wareg ngobrol, Kosim nganggeuskeun heula pagawean ngecetna nu ukur saeutik deui. Beres ngecet, Kosim balik heula ka imahna. Sorena torojol deui ka imah Yayat. “Ieu artos teh Kang sadayana 10 juta rupiah.” Ceuk Kosim bari ngasongkeun duit ka Yayat.

“”Eum dasar milik, keur nyiar modal langsung aya, muga - muga we di lancarkeun usaha teh.” Ceuk gerentes hate Yayat bari gap nampanan duit ti Kosim. Di itung lalaunan, tuluy di lolos dua juta rupiah.

“Ku kuring di tarima Sim, tah ieu keur Kosim.” Duit dua juta teh di asongkeun ka Kosim, tapi Kosim kekepehan, “Duh sawios kang, da abdi ge sok di pasihan ku Nyi Usniah teh.” , “Nya keun we da eta mah ti Nyi Usniah, ieu mah ti kuring. Wayahna di tarima Sim.” Yayat keukeuh, malah duit teh di seselkeun kana saku bajuna Kosim.

“Hatur nuhun pisan kang. Kumaha upami Nyi Usniah dongkap ka rorompok abdi ?” Kosim rada bingung sabab Nyi Usniah teh sok remen ka imahna, nanyakeun duit kontrakan imah. “Kieu we Sim, bejakeun kuring geus datang, da ke ge kuring bakal nepungan ka Nyi Usniah sarta budak di imahna. Ngan bae ayeuna mah kuring rek usaha heula sangkan boga cecekelan.” Jawab kosim. “Mangga ari kitu mah kang kin pami ka payunan Nyi Usniah ka rorompok ku abdi bade di sanggemkeun sakumaha saur Akang.” Ceuk kosim bari unggut - unggutan.

Geus kitu mah Kosim jeung Yayat uplek ngobrol, nyacapkeun kasono, sabab mang puluh - puluh taun heunteu patepung. Malah Yayat nanyakeun ka Kosim ngeunaan dimana tempat anu rame kunu jualan batu ali.

Nya di jawab ku Kosim, di tiap tempat ge rame, ngan bae nu rame mah di jalan Amir Mahmud hareupeun Samsat Cimahi, tuluy di Pasar Cimindi, oge di Pasar Antri Baru

Isukna kira - kira wanci haneut moyan, Yayat geus indit ti imahna. Maksud sarta tujuanana mah rek nempoan tempat - tempat anu sakirana cocok pikeun manehna dagang batu ali. Sabab Yayat boga paniatan rek dagang teh moal jauh - jauh, rek nu deket bae ka imah sangkan imah ka urus sarta teu kudu loba pangaluaran deui.

Sanggeus meunang satengah poe ngulincer nyurvey tempat, Nya Yayat teh cop ka lokasi nu di hareupeun Samsat. Sanajan ukur ngemper di sisi jalan raya tapi nu datangna mani loba kawas anu di jalan pungkur, jalma timamana meh tamplok sarua nyiaran batu ali sarta aksesorisna.

Yayat geus menta idin ka kokolot padagang di dinya, nya di idinan sabab manehna ge sarua ukur ngemperan di dinya teh, tapi da di idinan ku Samsat oge malah loba pagawe Samsat nu jadi palanggan batu ali, saratna ukur wajib ngajaga kabersihan, ulah tepi ka aya sampah di urut tempat dagang teh.

Hate Yayat beuki Sumanget, manehna teu nolih kana kacape, langsung megat angkot jurusan Kebon Kalapa, rek nepungan Sarju di jalan Pungkur. Rek bebeja bari menta di anteur balanja ka Rawa Bening Bekasi.

Teu kacatur di jalana, kocapkeun bae Yayat geus tepi ka jongkona Sarju. Sarju masih sibuk lalayan sabab nu balanja mani pabuis, malah ayeuna mah aya tukang gurinda anyar, budak ngora keneh paling kolot ge umur 18 taunan.

“Eh Geuning Abah Sumping, mangga calik heula bah. “ Ceuk Sarju ngabageakeun Yayat nu kakarak srog ka dinya. “Enya Ju rek ngupat heula nya abahna, ti tatadi beuteung can kararaban nanaon ieu teh.” Ceuk Yayat bari ngoloyong ka tukang, ngadeukeutan ka roda tukang kupat tahu. Sarju mah terus bae laladang nu barang beuli.

Meunang sajam, Sarju nyampeurkeun ka Yayat. “Kumaha bah, hasil tujuan teh ?” Tanya Sarju bari seuri katembong ayeuna mah huntuna beresih, teu cara biasana kandel ku ulam anu koneng semu hejo.

“Bangun bungah kitu Ju, meunang bati gede sigana nya ?”, “Lain masalah bati ieu mah Bah, tapi kuring balikan deui jeung indung budak, malah budak lalaki kuring tuh si Karsim milu mantuan ngagurinda ayeuna mah hehehehehe.”, “Oh pantesan atuh.”, “Pantesan naon bah ?”, “Euh...” Yayat teu kebat, teu kongang rek nyebut huntuna jadi beresih teh.

“”Ah henteu Ju, pantesan we rada beda ti sasari hehehhehehe..”, “Nya beda atuh da tos gaduh casan kiwari mah Bah. Lain kumaha rencana Abah teh ?”, “Nya hasil modal teh Ju, Abah rek menta di anteur balanja tea.”

“Siap Bah, isukan bae bareng, kabeneran isuk ge kuring arek balanja Bah, sabab setok batu jeung watang geus orot.”, “Enya Ju, ngan bae ukur boga dalapan welas juta, jauh keneh atuh kana cukup mah meureun Ju.”

“Ngereyeuh bae atuh Bah, ke sabulan ge ngagedean ari dagang keur marema mah, kurangna mah sok wae nyokot heula barang kuring, tuh gurinda bawa hiji, da nu kapakena ge ukur hiji, kuring mah geus jarang nyekel apan, da ku laladang ge mani asa ripuh.”

Beungeut Yayat tambah marahmay, Sabab Sarju teh geuning bener ngadukung pisan kana paniatan dirina. Atuh kaituna mah dua sobat teh guntreng ngobrol, ari nu di obrolkeunana teu jauh ti masalah batu ali.

Peuting eta mah yayat ngarereb di kontrakana Sarju, sabab subuhna rek mariang ka Rawa Bening, rek ngahaja ngulak batu ali keur dagangeun poe pageto. Emih pamajikana Sarju sarua bageurna jeung Sarju. Teu sirikna sagala di suguhkeun nempo Yayat datang jeung salakina teh.

Peuting eta mah Yayat dahar nikmat sabab pais peda cingeung karesepna nyampak maturan sangu nu ngebul, bacem tempe, goreng emping, sambel tarasi mani medok, surawung jeung terong ngora minangka jadi lalabna. Tara biasa dahar loba ge peuting harita mah Yayat tepi ka nambah dua kali.

Bagian 7 

Gancangna carita. Yayat geus ngamimitian dagang batu ali. Mimiti dagang ge dasarna jalma waktu harita keur gandrung ku batu ali, atuh jol di ronom bae dagangan Yayat teh. pada ngilikan, pada nawar, aya oge nu langsung meuli.

Pikeun Yayat mah kacida bungahna, mimiti dagang geus rame kunu meuli teh. Laladang ge teu weleh bari seuri, perbawa hate anu keur pinuh ku rasa bagja. “Jang gadung batu bacang ?” Saurang aki - aki geus kolot mun di taksir mah umurna sigana aya kana 80 taunan. Ngan bae katempo masih jagjag, dina ramona rembel batu ali sagarede endog puyuh kenca katuhu, dina dadana ngagantel liontin batu pancawarna ngabentuk gambar gajah keur diuk.

“Bah, batu bacang mah teu aya, aya ge batu bacan panginten ?!” Tembal Yayat ka si abah nu kakarak cingogo hareupeun dagangana. “Hus ! lain rek meuli kacang kami mah, rek meuli batu ali sujang !” Ceuk Si Abah bari rada muncereng ka Yayat.

“Haduh, torek sigana aki - aki teh.” Gerentes hate Yayat. bari Pok deui nyarita rada bedas. “Bah sanes kacang, maksad teh aya ge batu Bacan.”, “Aeh - aeh, si Sujang teh saliwang kitu. batur nanyakeun batu ali, naha los los ka amitabacan, kami ge apal eta mah bentang felm india.” Ceuk Si Abah tambah muncereng asa di heureuykeun ku Yayat.

“Ih Bah sanes amitabacan maksad teh batu bah batu bacan.”, “Ulah sok ngaheureuyan kolot Jang, kieu - kieu ge abah teh masih laku ka parawan mah.” Atuh ger nu aya di dinya teu kuat nahan piseurieun, sabab si Abah jeung tukang batu ngobrolna beuki pajauh.

Saurang awewe geulis anu keur milihan watang, ngiser ngadeukeutan si Abah, “Abah teh palay naon ?” Ceuk eta awewe tumanya bari imut ngagelenyu. Si abah malik ka si awewe, “eh Eneng mani geulis, gaduh caroge heunteu neng ?”, “Abdi mah randa bah”, “Oh, ieu abah teh palay batu bacan neng.”, “Ku Eneng di pilihkeun nya, asal enengna peserkeun hiji.”

“Mangga Neng mangga dua ge teu sawios - wios.” Nu sejen kerung ka asup Yayat, sabab geuning ari jeung awewe geulis mah si abah teh nyambung nyaritana. Si awewe ngicepan ka Yayat, Yayat surti ngasongkeun batu bacan anu aya dina cepuk husus.

Di pilih dua nu pangalusna, “Tah ki, ieu cocok kangge aki, ieu kangge abdi, Mang sabaraha pangaosna ?” , “Nu eta dua teh janten lima juta rupiah Neng.”, “Bah lima jutaeun.” Ceuk si awewe bari meberkeun lima jaro leungeun katuhuna.

Si Abah ngusiwel kana dompetna, duit ratusan rebu lima puluh lambar di asongkeun ka Yayat. “Yayat haripet nampanan duit ti si abah bari seuri bungah. “Neng hayu ah urang emam heula, kin shoping sareng abah.” Ceuk Si Abah bari nguniang hudang, di tuturkeun ku si awewe. Si awewe leumpang di kaleng ku si abah nuju ka warung sangu.

Nu aya di dinya, ting serengeh seuri, saterusna mah saribuk sewang - sewangan milihan deui batu ali bahan atawa anu geus jadi. Yayat ukur gogodeg, sup duit lima juta di asupkeun kana jero tas cangklekna.

Ti mimiti poe harita, usaha batu ali Yayat terus haneuteun, malah sabab kateter ku laladang, Kosim ge di tarik milu mantuan bari di ajar kana ngabentuk batu ali. Kosim kacida bungahna di ajak gawe teh, sabab geus lila teu boga pacabakan, katambah - tambah manehna mah resep kana batu ali teh.

Meunang sabulan dagang, Yayat geus nyakuan bati tepi ka 50 jutana, Hatena reugreug sabab boga niat rek ngadatangan Nyi Usniah katut anakna. Ari geus nyakuan duit rada mundel mah Yayat kahudang kawanina.

Malam minggu ngahaja Yayat tutup sore keneh. Bebeja ka Kosim ge yen rek nepungan Nyi Usniah. Teu kacatur di jalana ojeg nu di tumpakan ku Yayat geus eureun hareupeun imah Nyi Usniah di jalan Margaluyu.

Imah teh masih kawas nu baheula, cetna oge can rubah. “Euh ka alaman deui aing nganjang ka imah ieu, sugan we hasilna kawas baheula.” Gerentes hate Yayat. Sajongjongan mah ukur ngadon ngajenjen we hareupeun panto. Tapi Yayat ngabuledkeun tekadna, manehna hayang ngomean hubunganana jeung Nyi Usniah.

“Trok..trok..trok..Assalamu’alaikum..” Kadenge sora panto di ketrok di tungtungan kunu uluk salam. “Wa’alaikumsalam, saha nya ?” Nyi Usniah anu kabeneran keur aya di imah ngajawab, bari muru kana panto.

Bray panto di buka, Dua pasang panon bantrok pateuteup. Sagala rasa anu salila ieu di sidem sajeroning dada, ngagalura deui cara baheula, pagalo, campur aduk. Kasono puluhan taun nu jadi bangbaluh kalbu, kumejot hayang geura di cacapkeun.

“Euh...euh...ieu teh..Akang ?”, “Muhun Nyai ieu teh Akang.” Mun ceunah kongang mah, hayang silih gabrug harita keneh. Ngan bae aya sesekelan anu can tuntas ngahalangan kana sagala kahayang hate.

“Kalebet kang.” Ceuk Nyi Usniah, anu masih katara geulis, sanajan gurat kakolotan geus mimiti katempong dina kulitna. “Hatur nuhun Nyai.” Yayat ngalengkah asup ka jero imah, gek diuk dina korsi nu aya di ruang tamu.

Nyi Usniah ngaleos ka dapur, teu lila balik deui bari nanggeuy baki di eusi ku ci enteh manis karesep Yayat di baturan ku sakeler kiripik sampeu. “Ngaleueut Kang.” Ceuk Nyi Usniah nyodorkeun citeh manis ka hareupeun yayat, tuluy gek diuk dina korsi.

“Hapunten akang Nyai, tina sagala kalepatan akang salami ieu.” Ceuk Yayat sorana alon meh teu kadenge ku Nyi Usniah. “Engkang... Nyai ge nyuhunkeun di hapunten....tos wantun ngantunkeun engkang...” segruk Nyi Usniah ceurik, teu wasa naha parasaan kagagasna.

“Tos Nyai, sadaya kalepatan ayana di akang, nyai mah teu lepat. Akang bade tumaros, naha leres urang teh gaduh putra ?” Yayat nayakeun masalah anakna. “Muhun leres kang, putra pameget, namina Asep Baryat, tos yuswa 22 taun. Harita teh abdi ngandung dua sasih, teu acan kabujeng sasanggeum, kabujeng...” Caritaan Nyi Ustiah teu kebat.

“Tos Nyai ulah di sabit deui, akang ngamaklum, naha budak teh kamana ayeuna ?” Ceuk Yayat nayakeun anakna. Biasa kang pamuda mah nuju malam mingguan panginten, amengan sareng rerencanganana.” Jawab Nyi Usniah bari neuteup bengeut Yayat.

“Nyai, kalah kumaha oge Nyai teh masih bojo akang, sabab akang teu acan rumasa mirak ka Nyai. Naha Nyai satuju upami urang neraskeun rumah tangga nu sempet kapegat ku waktu.” Bari semu nu nahan bangbaluh Yayat ngedalkeun paniatanana.

Nyi Usniah sakedapan mah ngahuleng ngadenge kahayang yayat teh. Lain teu bogoh lain teu cinta ka yayat teh, tapi Nyi Usniah masih bangbaungeun, sieun Yayat tega cara baheula, tepi ka ngagadekeun kahormatan dirina ka tukang beca ku alatan eleh judi. (ngeunaan carios Nyi Usniah anu di gadekeun tiasa di aos di buku kalangsu jilid 2).

“Kumaha Nyai ?”, “Euh...” Brak kaburu panto aya nu muka ti luar. Yayat sarta Nyi Usniah ngarenjag 

Bagian 8

Blak panto muka, saurang budak ngora jangkung leutik, buukna gondrong asup ka jero imah, leumpangna rada nyolontod. “Aeh keur naon Ema paduduaan jeung ieu aki - aki ?, aki rek naon ka dieu, rek mere deui duit ka uing ?” Ceuk eta jajaka anu taya lian Asep Baryat, tina bahamna nyelebreng bau inuman. Asep Baryat masih apaleun ka Yayat anu sababaraha poe ka tukang pernah nubruk manehna di jalan gandawijaya.

“Asep nu sopan lamun nyarita, eta teh bapa hidep !” Nyi Usniah anu nembal, teu panuju kana kecap - kecapan Asep Baryat. “Naon Ma, uing teu salah denge ieu teh ? “ Sanajan bari jeung satengah mabok, teu wudu Asep Baryat ngarasa reuwas, sabab ti leuleutik can pernah panggih jeung bapa, kiwari jol aya hareupeun pisan.

Jung Yayat nangtung, “Hidep teu lepat dangu anaking, ieu teh bapa, bapa hidep.” Yayat neuteup ka Asep, sorana beurat ku bangbaluh rasa, anu puluhan taun di sidem dina jero dada. Asep Baryat ukur ngajanteng, bingung kudu kumaha, aya rasa sono, gumbira, sedih, sarta ambek pagalo ngajadi hiji.

“Hapunten bapa Sep, takdir tos misahkeun kulawarga urang, hapunten bapa anu teu tiasa ngasuh hidep ti lelembut, teu tiasa ngaping ngajaring, sareng ngatik hidep salami ieu.” Teu karasa aya nu haneut bedah tina kongkolak Yayat. nyurucud mapay pipina anu kiwari geus rada kemong kagerus ku umur.

Asep Baryat leuleus awakna ngalumpuruk rek nyuuh kana sukuna Yayat, Ku Yayat di gabrug tuluy di diukeun dina korsi, bari di usapan. “Geus Sep, kiwari mah bapa hidep geus datang, kulawarga urang lengkep deui. Eureunan kana mabok, kana ulin teu pararuguh teh.” Nyi Usniah mapatahan ka anakna.

“Enya mending ge bantuan bapa dagang, Bapa ayeuna dagang batu ali di hareupeun Samsat di bantuan ku Mang Kosim, tah ieu duit keur hidep jeung indung hidep sok pake balanja pangabutuh, bisi butuh nanaon bebeja ka bapa.” Yayat ngusiwel kana tas cangklekna, song mikeun duit lima juta ka Asep Baryat.

Asep Baryat jeung Nyi Usniah olohok sabab saumur hirup kakarek nempo duit lima juta teh, da salila ieu kahirupanana warurat pisan, paling gede ge nyekel raratusan, eta ge ladang nyewakeun imahna Yayat tea.

Duit di tampanan ku Asep, tuluy di bikeun ka indungna. “Pa pami Asep gaduh pamundut tiasa pa ?” Asep Baryat ngajukeun pamenta. “Na hidep teh hayang naon kitu Sep ?” Tembal Yayat bari neuteup ka anakna. “Euh.. euh...teu naon - naon kitu pa ?” Asep kawasna asa - asa rek ngedalkeun kahahayangna.

“Sok we wakca balaka ka bapa mah, nu sakirana kahontal atuh ku bapa bakal di tedunan, ari sakirana teu kahontal mah nya wayahna moal di tedunan.” Ceuk Yayat deui. “Asep teh hoyong gaduh motor pa, cara batur, supados tiasa nganteur ema ka pasar, hawatos kana angkot bae, kadang mah ema teh mapah ka pasar teh.” Asep baryat nyaritana bari ngeluk tungkul teu wani tanggah neuteup bapana.

“Oh hayang boga motor, heug atuh ke isuk pageto urang meser motor Sep, ngan wayahna lamun motor geus aya, bapa ge boga pamenta ka Asep.” , “bade nyuhunkeun naon Pa ?”, “Bapa peupeujeuh lamun ngajalankeun motor ulah sok kekebutan, kaduana wayahna bapa ge hayang di anteur ka tempat dagang unggal poe ku Asep.”, “Oh muhun pa, siap pa.”

“Tah kitu we heula nya Sep, bapa rek mulang heula ka bumi anu di kebon cau.”, “Naha teu ngendong di dieu we atuh pa ?”, “Enya kang, tos wengi ngarereb di dieu we, da sanes sasaha atuh.” Ceuk Nyi Usniah milu ngahulag, pedah Yayat rek balik.

“Ih apan imah teu di tarulakan, terusna bisi Kosim neangan akang ke.” Ceuk Yayat alesan, padahal mah imah teh di tulakan, malah ka Kosim ge bebeja rek ka Nyi Usniah. “Wios pa, da bumi mah moal kukumaha, moal aya nu kalebet, da salami ieu ge aman - aman bae.” Asep keukeuh nyengker bapana. “Muhun kang, karunya si Asep masih sonoeun.” Nyi Usniah sarua nyaram, da sabenerna mah Nyi Usniah anu ngarasa sono nataku ka salakina. “Nya atuh ari kareukeuh mah, mah akang moal mulang” Yayat surak dina jero hatena.

Tepi ka peuting tiluan ngawangkong di tengah imah, sagala di caritakeun, sagala di dongengkeun, nyacapkeun kasono anu geus teu bisa ka taker , lamun kudu di taker tea mah. liwat tengah peuting Asep asup ka kamerna, sedengkeun Yayat mah rek ngagoler dina korsi panjang, ngan bae ku Nyi Usniah di tuyun di ajak ka kamerna. Satuluyna mah teu kudu di caritakeun, sabab pamiarsa ge geus pada surti.

Ti Saprak harita Yayat riung mungpulung deui jeung Nyi Usniah sarta Asep Baryat. Asep Baryat di beulikeun motor, budak teh ari datang bapana mah ngadadak rubah jadi bageur, teu sakara - kara mabok - mabokana eureun, sarta rajin mantuan bapana jualan sarta moles batu ali.

Atuh kahirupan kulawarga Yayat beuki lila beuki maju, bati batu ali anu mujekil teh di pake ngabangun kontrakan, imah anu di margaluyu mah ri hebab di jieun kontrakan bahasa kiwari mah kos kosan meureun, kabehna aya genep kamerna kontrakan teh. Imah nu di kebon cau ge di bangun di anyaran, model wangunan jaman ayeuna. Di tempatan ku Yayat sakulawarga.

Tapi sagalana di dunya aya watesna, teu lana. Beurang kasilih ku peuting, peuting ge kagusur ku beurang, usum ge aya wancina. Nya usum demam batu ali ge sarua kakeunaan watesna, Nincak taun 2016, batu ali geus mimiti sepi peminat, Jalma nu datang nyiar batu ali, ukur hiji dua, teu cara taun - taun katukang, teu sirikna unggal waktu jalma ngagimbung di tukang batu ali.

Loba padagang batu ali, nu ahirna banting stir, ganti pacabakan, dagang barang sejena atawa milih jadi pagawe pabrik, Di hareupeun kantor Samsat anu tadina ngajajar aya kana salawe urangna padagang batu ali, ayeuna ukur nyesa lima urang, ka asup Yayat, eta ge kadang buka kadang heunteu, teu nangtu cara baheula.

Yayat rada bingung, naha rek ganti pacabakan atawa nuluykeun dagang batu ali. Ari rek eureun bingung kudu usaha naon, ari rek terus dagang batu ali, da sepi nu meuli, kadang sapopoe ge teu ngalarisan - ngalarisan acan.

Hiji mangsa Yayat keur ngalamun bari nyanghareupan daganganana. Keur kitu datang saurang aki - aki, awakna begung, rengkung, buukna gondrong di beungkeut ka tukang sanajan geus huis hungkul, tapi eta aki - aki masih katingali rancingeus sarta jagjag tina gerakan leumpangna.

Eta aki - aki jol nagog hareupeun dagangan Yayat, bari neuteup ka Yayat, “Ke ke ke ieu teh Jang Yayat tea lain ?” Ceuk eta aki - aki bari kerung - kerung bae halisna. “Ieu teh kang Agus cangkir tea sanes ?” Ceuk Yayat, apaleun keneh ka Agus cangkir, sobat ngodena heubeul sawaktu jaman SDSB. (ngeunaan Agus cangkir tiasa di guar di buku Kalangsu jilid 1)

Bagian 9

“Lawas ti lawas Yat, dagang batu nya ayeuna mah. Mani sagala aya kieu euy.” Ceuk Agus cangkir bari leungeuna ngayap nyabakan batu ali dagangan Yayat. “Nya lumayan bae kang, ngan kiwari mah sepi pisan dagang batu ali teh. Ieu ge keur mikir - mikir rek ganti pacabakan ngan masih bingung, kudu usaha naon.” Tembal Yayat bari humandear.

“Urang bisnis we atuh Yat jeung akang, Bisnis gede batina ieu mah.” Ceuk Agus Cangkir deui bari nyerengeh seuri, tembong huntuna geus loba nu ompong luhur handap. “Bisnis naon kitu kang ? ari gede batina mah, nya kuring rek milu atuh.” Yayat panasaran, bubuhan ngadenge batina gede.

“Ah teu salse ngobrol di jalan kieu mah Yat, ulin we ka imah akang atuh, da masih di kebon kalapa, deukeut ti kebon cau mah apanan. Meh rineh bisa bari ngopi.” Agus Cangkir seuri deui, leungeuna tetep milihan batu ali.

“Nya ke abdi amengan atuh ka bumi kang Agus, pasosore paling ge kang ke geus beres dagang.” Yayat ngajanjian ke sore rek ulin ka imahna Agus Cangkir. “Tah kitu atuh, di antos ku akang nya. Nu ieu sabaraha yeuh, rada bogoh ku kelirna.” Agus cangkir ngasongkon batu bodas tapi jerona aya uratan ngabentuk jungjung darajat.

“Nu eta mah ukur saratus rebo kang.”, “Batu naon ngarana ieu teh Yat ?”, “Kinyang banyu Kang, ngan aya urat jungjung darajatan, tuh ning kawas pangkat tentara nyetrip tilu.”, “Ulah mahal - mahal atuh Yat, kangna ge ukur boga mawa lima puluh rebu.”

Yayat ngahuleng, tapi ari keur kaayaan dagang sepi kitu mah, aya batian ipis ge pikir Yayat lumayan bae daripada euweuh nu meuli, “Kangge Kang Agus mah mangga bae lima puluh ge, itung - itung kenang - kenangan.”

“Nuhun atuh Yat.” Agus Cangkir nyakuen batu kinyang pamilihna, song ngasongkeun duit sabebed dua rebuan hungkul ka Yayat. “Mani receh hungkul kieu atuh kang, murak cengcelengan atawa kumaha ieu teh ?” Ceuk Yayat bari mesem, tapi teu wudu eta duit receh teh di tampanan.

“Miceunan receh Yat, nu galabagan mah loba di imah, eta mah sok sesa jajan di kumpulkeun. Kitu bae nya Yat, Akang mulang heula, bari aya miting bisnis keudeung deui ieu teh.”Ceuk Agus cangkir, tuluy cengkat, nyalaman yayat, saterusna mah megat angkot ka arah Pasar Antri.

Kadorong ku rasa panasaran ngeunaan bisnis anu gede batina tea. Pasosore Yayat indit ti imahna, bebeja ka Nyi Usniah mah rek kababaturan, rek nyiar usaha anyar, sabab dagang batu ali geus karasa lesu pisan.

Teu kacatur di jalana Yayat geus tepi kahareupeun imahna Agus Cangkir nu aya di lembur Kebon Kalapa. Pok Yayat uluk salam, “Assalamu’alaikum, Punten !”. “Wa’alaikumsalam. Mangga.” Ti jero imah aya anu nembalan. Teu lila torojol Agus Cangkir kaluar ti jero imah.

“Eh Yayat ning. Mangga kalebet Yat, ngobrolna urang di lebet weh.” Sup Yayat Asup tuluy diuk dina korsi butut di ruang tamu. Agus cangkir ngaleos ka dapur, teu lila balik deui bari nanggeuy dua geulas nu di eusi ku cikopi, sor nu hiji di asorkeun ka hareupeun Yayat.

“Lain kang kuring mah panasaran ieu teh, ceuk akang, akang boga bisnisan anu hasilna mujekil, bisnis naon atuh kang nu sabenerna. coba terangkeun ka kuring !” Yayat langsung bae nanyakeun ngeunaan bisnis anu ku Agus Cangkir di janjikeun baris di pedar di imahna.

“Kieu Yat, lamun Yayat mah kana mangrupa - rupa batu ali, ari akang mah kana mangrupa - rupa barang aheng, anu hargana salangit, miliaran tepi ka triliunan rupiah. Nyaeta kana bisnis UB, MD, RB, BK, AB, jeung sajabana.” Ceuk Agus Cangkir bangun daria naker.

“Can pati kaharti kang ? naon ari UB, MD, RB, BK, AB teh kang ? mangrupa naon eta teh ?” Yayat kerung halisna da memang teu ngarti sama sakali kanu di caritakeun ku Agus cangkir. Ngadenge ge karak harita.

“Nya ku akang di terangkeun. UB teh singketan tina Uang Brazil. Uang Brazil teh mangrupa duit lambaran nagara Brazil anu baheula di sumbangkeun ka Bung karno di jaman kamerdekaan. Duit UB laku kiwari di hargaan Mun salambar duit UB anu 5000 hargana teh 100 lipet jadi 500.000 rupiah. Mun urang boga samiliar duit UB urang bisa ngadadak benghar bisa jadi 100 miliar apanan.” Ceuk Agus Cangkir bari pepeta.

“Oh kitu eta teh kang, na kudu kamana nyiaran duit UB teh kang ?” tanya Yayat deui. “Ayana di Kyai atawa jalma - jalma pinter anu baheulana katitipan ngajaga eta UB. lolobana eta UB teh di petian di sumputkeun dina guha - guha, atawa rohangan rahasiah, aya oge anu di titipkeun ka sabangsaning mahluk goib. Pikeun narekahna urang kudu nyiar informasi saha anu boga konci pamuka atawa katurunan anu kolotna katitipan duit UB ti Bung Karno. Tapi ulah salempang, jaringan akang loba nu nyahoeun.” Ceuk Agus cangkir deui nerangkeun panjang lebar.

Yayat unggut - unggutan rada kahartieun ayeuna mah, “Tah lamun RB, BK, MD, AB eta naon kang ?” Yayat tambah panasaran. “Tah mun eta mah kasebutna anti silet/ anti cukur lolobana nu nyiar atawa bayerna jalama - jalma sugih, para konglomerat. maranehna daek meuli ku harga triliunan.”

“RB teh singketan tina Rante babi, BK mah Batara Karang mangrupa jenglot, Ari MD Merah Dalima, tah lamun AB nyaeta Awi Buta atawa pring petuk lamun di jawa mah. Kabeh barang nu di sebutkeun ku akang bieu, ngabogaan kasiat masing, masing, lamun MD, AB, BK, meh kabeh anti cukur, jalma nu nyekel eta barang bakal moal teurak ku pakarang. Tah mun AB mah anti panas, najan seuneu ngabebela oge mun urang nyekel AB seuneu eta di ragap ku urang moal karasa panas. salian ti kitu oge pikeun penglarisan usaha.” Agus cangkir bisa pisan nerangkeuna malah bari pepeta sagala.

“Barangna model kumaha kang ? Akang gaduh contona ?” Ceuk Yayat hayang leuwih jelas kawasna mah. Agus Cangkir ngojengkang ka jero pangkengna. Teu lila manehna kaluar bari mawa kotak kayu leutik. Kotak di buka, Agus ngaluarkeun dua lambar duit UB warna hejo, terus ngaluarkeun jenglot leutik nu di bungkus ku kaen bodas, oge ngaluarkeun awi koneng anu dua ruasna aya pucuk nu nongol bari saling nyilang.” Tah ieu salah sahiji contona, ngan ieu kabeh teu guna, sabab barang kosong, geus di tinggalkeun khodamna.” Mun duit UBna mah asli.”

Yayat ngilikan sakabeh barang nu aya di jero kotak kayu bogana Agus cangkir. “Ari urang bakal jadi naon atuh dina bisnis ieu teh Kang ?”, “Mun boga modal mah urang nyiaran barang terus beulian, ke dijual na ge ngeunaheun batina kabeh keur urang, tapi mun teu boga modal, nya paling jadi perantara, alias calo, urang ukur nepungkeun nu boga barang jeung nu meuli, di berena oge nya paling banter 1% tepi ka 10% tina harga barang.”

“Lamu Yayat boga modal, teu kudu gede 50 juta we, urang meulian heula UB we anu masih katepi hargana sabab lamun barang MD, RB, Bk, AW jeung nu sejena mah akan miliaran. Ari UB mah meuli sagepok oge ukur lima sapuluh juta di jual apan bisa tepi ka 100 juta. Meureun mun boga modal 50 juta teh saleutik - leutikna boga bati 500 juta alias satengah miliar.”

Ngadenge bati ratusan juta tepi ka miliaran kitu mah, Yayat teh lat bae poho kana kanyataan. lamunana ngawang - ngawang nyinyipta bati anu miliaran rupiah, da pikirna Yayat mah bisnis UB teh teu jauh kawas maen valas alias tuker beuli valuta Asing.

“Ari ukur 50 juta mah kuring boga kang, nya iraha urang mimiti nyiaran UB na kang ?”, “Heueuh sukur ari boga modalna mah, masalah waktu mah kumaha siapna Yayat we, da akang mah sten bai bae di imah, sabab kadang loba tamu bae ka dieu ge.”, “Nya ari kitu mah ke kuring isuk pageto ka dieu deui atuh kang.”

Saterusna mah Yayat jeung Agus cangkir uplek ngobrol bari ngopi, nu di obrolkeun teu jauh ti bisnis UB jeung nu sejena. Sakapeng ting cakakak sareuseurian ka buai ku impian bati anu teu asup di akal.

Bagian 10

Dua poe ti harita Yayat datang deui ka imahna Agus Cangkir. Geus saged dangdan sabab rek sakalian nyaba nyiaran UB tea malah datangna teh bari mawa motor bebek nu anakna. Ari Dagangan batu ali mah di tungguan ku Kosim sarta Asep Baryat anakna Yayat.

“Kamana urang nyiar UB teh kang, aya informasi anu jitu teu ?” Ceuk Yayat bari ngahurungkeun roko bodas karesepna. Sep srebung hasep nyerebung tina liang irung Yayat mirip jeung kebulna kareta KRD taun 90-an.

“Kamari Akang geus ngebel kana ling akang anu di Cianjur, ceunah mah di lembur Cijati aya hiji kolot ngarana Bah Tarya, manehna baheula pernah ngajual UB 20 lambar. Susuganan we aya keneh Yat, urang teang ka ditu.”Jawab Agus Cangkir bari ngalolos roko nu Yayat sabatang tina bungkusna.

“Nya hayu atuh urang kaditu, mungpung masih isuk kang, urang kana motor we lah, itung - itung bari jalan - jalan.” Ceuk Yayat deui tuluy ngaleguk sesa cikopi panyuguh tinu boga imah. “Nam atuh urang indit Yat.” Agus Cangkir ngahayukeun bari tuluy rap make jaket levis kameumeutna anu geus belel bakat ku mineng di pake.

Yayat ngahurungkeun motorna gerung - gerng motor di sada, clak Agus Cangkir numpak di satukangeun Yayat. Motor di gas, geuleuyeung maju muru ka jalan raya, geus tepi jalan raya leok ngenca ka arah Padalarang anu saterusna mah tembus ka Cianjur.

Gancangna carita, nu duaan geus tepi ka Cijati, malahan mah geus nepungan Bah Tarya di imahna. Bah Tarya teh hiji kolot ised saeutik leuwih kolot ti Agus angkir mah, ngan bae dedegana jangkung badag teu cara Agus cangkir atawa Yayat anu jangkung leutik bari begang.

Harita tiluan ngariung di tengah imah Bah tarya, anu ngan sorangan di imahna teh, sabab geus di tinggal maot ku pamajikana 5 taun ka tukang. Imahna ukur imah bilik biasa kawas imah jaman baheula. Ukur kentengna anu kawilang anyar sabab geus di ganti make asbes.

“Saleresna aya kapeyogian naon, tebih - tebih ti Cimahi nepungan Abah di dieu teh ?” Bah Tarya tumanya ka tamuna. “Kieu bah ieu mah langsung bade tog mol we nya. Nu kahiji abdi sareng ieu sobat abdi teh bade silaturahmi ka abah, tah nu kaduana mah aya peryogi, nyaeta bade meser UB, margi aya informasi yen abah teh kagungan UB.” Ceuk Agus Cangkir langsung kana pokona.

“Oh bade meser UB, Aya UB mah ngan bae moal tiasa masihan seueur, margi sanes waktosna Abah ngaluarkeun UB tina petina. Paling oge tiasa masihan ukur tilu lambar.” Jawab bah Tarya, paromana teu riuk - riuk reuwas atawa aneh kadatangan jalma nu rek meuli UB teh, kawas anu geus sering ngalakukeun jual beuli Uang Brazil.

“Duh naha bah, padahal mah abdi bade meser seueur ieu teh ?” Yayat milu nyarita bari rada kerung teu pati ngarti kunaon bah Tarya teu daek ngajual loba. “Sanes nolak rejeki Yi, mung bae muka peti UB teh teu sagawayah kudu nincak kana wancina. Tah upami peryogi seueur mangga dongkap deui 10 dinten kapayun margi 10 dinten kapayun mah tos nincak sasih mulud, Abah tos gaduh idin pikeun muka peti UB.” Bah Tarya mere katerangan kanu duaan.

“Muhun atuh bah, sawios nu tilu lambar we heula bade di bantun ku abdi, etang - etang monster aeh moster alah conto maksad abdi teh.” Ceuk Agus cangkir, bari ngareret ka yayat. Nu di reret unggeuk tanda nyatujuan.

Bah Tarya nguniang hudang tuluy asup ka pangkengna, teu lila kaluar deui bari mawa tas leutik. Bah tarya ngusiwel ngaluarkeun tilu lambar duit brazil warna hejo pecahan lima rebuan. Duit di asongkeun ka Agus Cangkir. Ku Agus Cangkir eta duit di ilikan, tuluy unggut - unggutan, “Asli Yat.” Geus kitu duit di asongkeun ka Yayat.

“Tah ku abdi di peser 10 lipet Bah. Ieu sadayana UB 15 rebu janten di bayarna 150 rebu bah.” Yayat ngasongkeun duit 150 rebu ka Bah Tarya. Ku Bah Tarya di tampanan bari nganuhunkeun, “Minggon payun bade meser sabarahaeun Ayi teh, kudu puguh supaya Abah nyiapkeun UBna oge puguh ?” Ceuk bah Tarya bari nyakuan duit kana saku bajuna.

“Nya siapkeun we lima puluh jutaeun mah Bah, jadi 5 jutaeun UB panginten bah.” Tembal Yayat bari ngasupkeun 3 lambar duit UB kana dompetna. Geus kitu mah Yayat jeung Agus Cangkir amitan da bisi kapeutingan di jalan.

Gancangna carita isukna duit UB teh di bawa ka baturna Agus Cangkir di kota Bandung. Nya di pastikeun duit teh asli bari di bayaran ku harga sajuta satengah. Yayat kacida bungahna narima bati anu sakitu gedena. Meuli ukur saratus lima puluh rebu ari di jual sajuta satengah. kabayang dina pikiran yayat lamun seug eta duit lima puluh jutaeun pastina mah bakal narima teh meureun moal kurang ti lima ratus juta alias satengah miliar. “Jadi miliarder atuh lamun terus kieu mah aing teh.” Ceuk gerentes Yayat dina batina.

Teu karasa poe nu di janjikeun geus datang. Yayt jeung Agus cangkir geus nepungan deui Bah Tarya di imahna pikeun nyokot UB anu lima juta tea. Bah Tarya teu geura - geura mikeun tapi kalahkah ngajak ngawangkong heula ngaler - ngidul, bari ngajak dahar babarengan sagala, ngadadak ngaliwet, alesana ceunah bisa di bikeun wanci ba’da isya. Yayt jeung Agus cangkir teu bisa kumaha, ukur bisa nurut kana caritaan bah Tarya.

Wanci Isya geus liwat, Bah Tarya ngojengkang ka pangkengna, balik deui bari mawa kantong keresek hideung. Keresek di buka jerona duit UB lima gepok. Sagepokna aya sajuta, mani kandel sabab pecahan UB ukur lima rebuan.

Duit UB di asongkeun ka Agus Cangkir. Ku Agus cangkir di ilikan bari di itung, Yayat oge mantuan ngitung. Beres di etang bari jumlahna jejeg, giliran yayat ngaluarkeun duit 5 gepok tina tasna sagepokna 10 juta rupiah pecahan saratus rebuan hungkul.

Gantian Bah Tarya anu ayeuna sibuk ngetang duit pamere Yayat. Sanggeus di rasa cukup Bah Tarya nyalaman Yayat. “Hatur nuhun Yi, artosna katampi.”, “Sami - sami Bah, iraha abdi tiasa meser UB deui.” Ceuk Yayat, mani karooh, padahal mah nu harita ge can di cairkeun. “Minggon kapyun ge tiasa YI, mangga di antos ku abah nya.” Ceuk Bah Tarya bari seuri bungah, ngasupkeun duit ti Yayat kana keresek hideung urut wadah UB.

Isukna kawas minggu kamari, Yayat di baturan ku Agus Cangkir manggihan deui nu sok meulian UB tea. Tapi barang teh di tolak, sababna nu aslina ukur salambar UB nu paling luhur bae, tina lima gepok teh, ukur lima lambar nu aslina. Nu sejena kabeh palsu menang nyeken tina komputer.

“Kurang ajar Bah Tarya teh kang geuningan nipu ka urang, ari akang kumaha mariksa teh, naha tepi ka teu apal yen eta kabeh UB palsu nu asli ukur nu paling luhur ?” Yayat maido ka Agus Cangkir anu memang di tugaskeun pikeun mariksa UB.

“Hampura Yat, si kehed teh pinter akalna. ngajak transaksi wayah peuting, lampu di imahna ukur bohlam lima watt, terus urang duaan akan sorena di parab liwet jeung lauk emas. Atuh mariksa UB teh bari rada nundutan, katambah akang mah mata geus kurang awas ari peuting teh. Pan yayat ge sarua milu mariksa lin ?” Ceuk Agus cangkir embung ari di salahkeun sorangan bae mah.

“Enya puguh geus ngararancang kawasna mah si gejul teh, sarua kang harita teh kuring kurang awas atuh da mata cepel, lampu reyem - reyem ukur lima watt, puguh we kurang sidik kana barang teh, ukur di usap nu pangluhurna, karasa asli, kaituna mah ukur ngetang lambaranana.” Ceuk Yayat bari kekerot nahan amarah.

Yayat ambek kacida ka Bah Tarya, harita keneh duit UB di bawa deui. Duanana gancang indit nuju ka imahna Bah Tarya. Datang kanu di tuju, kaayaan imah mani simpe, lampu ge harurung keneh. Yayat jeung Agus uluk salam bari keketrok rada bedas, tapi geus sababaraha kali uluk salam taya jawaban bae, panto imah di konci, kitu oge jandela, sarta panto tukang sarua di konci.

Keur gera - gero nyalukan Bah Tarya, kurunyung aya nu datang hiji lalaki tengah tuwuh di kopeah hideung tumanya kanu duaan, “Milari saha Pa ?”. “Milari bah Tarya kang, kamana nya ?” Jawab Agus cangkir bari malik ka si lalaki.

“Bah tarya mah nuju wengi angkat, nyariosna mah bade ka putrana nu di kalimantan.” Ceuk eta lalaki mere katerangan. “Dupi ieu bumina saha kang ?” Ceuk Agus Cangkir tumanya deui. “Oh ieu mah bumi abdi Pa, Bah Tarya mah ukur ngontrak. Nuju wengi teh bah Tarya nitipkeun konci bumi ka abdi bari wawartos bade ka kalimantan nganjang ka putrana.”

“Dupi Akang apal putrana di kalimantana alamatna di mana ?” Yayat nalektek panasaran. “Teu apal pa, da nembe terang yen putrana di kalimantan ge ukur ngadangu ti bah tarya. margi salami ngontrak di dieu mah putrana teh teu acan kantos ka dieu.” Ceuk eta lalaki deui.

“Cobi buka pantona kang, puguh abdi teh katipu ku Bah Tarya teh.” Ceuk yayat menta di bukakeun panto, pikir Yayat susuganan aya barang berharga nu sakirana bisa ngaganti karugian dirina.

Silalaki muka konci panto. Yayat jeung Agus Asup tuluy ngagaladah sakabeh rohangan. yakin taya barang nu gede pangajina di jero imah teh. Ukur aya piring kotor urut dalahar maranehna kamari, gelas, kasur butut, sarta samak saheulai.

Yayat diuk bari nepakan tarangna, “Cilaka kaya kieu mah kang !”. “Geus Yat hayu urang balik we, keun urang babarengan nyiar tarekah pikeun malikeun karugian nu ayeuna mah. Ieu teh dodoja rek pimajueun Yat rek pibeunghareun.” Agus Cangkir ngalelemu hate yayat sangkan teu putus harepan.

Najan bari lalungse Yayat nguniang hudang, saterusna numpak kana motorna boncengan jeung Agus Cangkir, sajajalan taya nu lemek taya nu nyarek duanana anteng ku lamunana sewang - sewangan.

Bagian 11

Ti Saprak katipu ku Bah Tarya, Yayat lain kalahkah kapok tapi tambah gawok. Tambah soson - soson ngungudag kalangkang heulang, nyiar barang nu can karuhan ka palidkeun ku impian meunang bati duit miliaran.

Sakabeh tempat oge jalma anu sakirana mibanda barang uka - uka, di datangan. Ieu teh teu lepas tina pangaruhna Agus Cangkir anu hayoh - hayohan mangaruhan Yayat supaya terus sumanget dina bisnis cangkerodna.

Tapi ngarana ngungudag kalangkang heulang, atuh nyamos jeung nyamos bae meunangna teh. Waragad pikeun ider - ideran mah geus teu ka itung, tepi ka imah Yayat ge surat - suratna geus di gadekeun ka bank pikeun ngamodalan bisnis teu pararuguhna.

Aya sakalina meunang barang Awi Buta, di tes dinu bogana mah enya seuneu teh karasa tiis, barang di tes hareupeun nu minat, Yayat gugurubugan da dampal leungeuna kabeuleum ku seuneu. Di teang deui kanu bogana, nya kitu geus taya di tempatna.

Lain sakali dua kali tapi geus teu ka itung katipu ku jalma kitu teh. Tapi dasar Yayat laina mikir kalahklah tambah panasaran. Yayat geus jarang di imah, kitu we tiap poena ngudag - ngudag info barang gaib nu can karuhan bener ayana.

Hiji mangsa Yayat geus balik ti daerah Cibiru, ngahaja muter ka Cibaduyut, rek nyiar sendal, sabab sendalna geus butut balas tiap poe di pake ider - ideran. Geus menang sendal kulit nu di pikahayangna. Yayat naek kana motorna maksudna mah rek mulang ka Cimahi. Tapi di salah sahiji toko aya anu gegeroan ka manehna, Yayat rungah - ringeh sabab rada asa - asa kana eta sora teh.

“Yat , Yat, Yayat eta teh ?” Saurang lalaki pantaran Yayat kaluar ti hiji toko sapatu. Dandananana necis perlente, sanajan geus kolot tapi kagagahan mangsa ngorana masih atra katempo.

“Ieu teh Raden Irfan Sumpena sanes ?” Tanya Yayat rada asa - asa keneh. “Tah geuning masih apal ka kuring, enya kuring Irfan Sumpena Yat, batur sakola ente baheula hahahahha, kadieu - kadieu, urang ngobrolna di jero.”

Irfan Sumpena ngajak Yayat ka jero toko. Diuk dina meja kasir pahareup - hareup. Ngeunaan Irfan Sumpena tiasa di aos dina buku kalangsu anu #Kalangsu jilid kahidi 1-14 tamat.

“Saacana kuring milu tunggara kana nasibna Ningrum Yat.” Irfan rada ngageuri waktu nyebutkeun ngaran Ningrum teh. Sabab dikumaha- kumaha oge apanan Ningrum teh pernah jadi pamajikanana bari sering di nyerikeun hatena, tepi ka menta talak, nu saterusna kawin jeung Yayat, cinta munggaran Ningrum. Ngeunaan Ningrum oge tiasa di aos dina pedaran buku #Kalangsu jilid ka 1.

“Nuhun, meureun geus jadi titis tulisna Ningrum kitu Fan.” Yayat ge jadi ngalimba, kasuat deui lalakon nu geus lila di kubur dina hatena. Ningrum nu geus jadi korban kalakuan dirina, kulantaran muhit kakayaan ka buta hejo.

“Kumaha kabarna ayeuna Yat, bisnis naon ayeuna ?” Irfan mindahkeun obrolan kana pagawean. “Ah kuring mah kana batu ali Fan, oge kana barang - barang antik.” Jawab Yayat teu satarabasna muka pagawean manehna.

“Lain geus lesu batu ali mah Yat ?” , “Enya puguh Fan, matakna rea nguriling kuring ayeuna mah.”, “Sapatu ge lesu Yat, toko titinggal kolot anu tadina aya opat, ayeuna mah kari hiji, eta ge geus rada ripuh pikeun ngagajih karyawan teh.”

“Hutang ka bank geus miliaran kuring teh yat, puguh keur butuh dana segar pikeun modal ayeuna teh.”, “Sarua wae fan.”, “Lain da ka bank kuring geus teu bisa nginjem, susuganan sorangan boga info ngeunaan jalma nu bisa narik harta karun atawa harta gaib, atawa nu bisa ngagandakeun duit oge pinjaman modal gaib ?”

Ngadenge kitu mah Yayat ngahuleng, geuningan mah Irfan ge sarua jeung manehna, paham jeung percaya kanu hal - hal mistis. Asa di jalanan atuh torolang bae Yayat ge medar lalakona anu keur ngungudag barang gaib nu hargana miliaran rupiah.

“Hese Yat lamun kitu mah, mending ge urang narikan harta gaib atawa harta karun zaman karajaan bisa oge emas batangan jaman pa Karno, sabab loba infona yen emas batangan titinggal karajaan sarta emas batangan meunang ngajabel ti Belanda sarta Jepang. Ku pa Karno loba di sumputkeun di kubur di tempat anu sunyi sarta di jagaan ku khodam - khodam kapercayaan anjeuna.”

“Ente boga kenalan jalma pinter nu bisa narikan harta gaib teu ?”, “Kuring mah teu boga Fan, tapi teuing mun kang agus mah, soalna manehna mah loba kawawuhna.”, “kang agus teh saha Yat ?”, “Sobat kuring Fan, ulin we atuh ka imah atuh, ke ku kuring di panggihkeun jeung kang Agus.”

“Nya siap atuh ari kitu mah, imah masih nu baheula lin ?”, “Enya masih di kebon cau Fan.”, “Ke isukan kuring ulin ka ditu, paling ge pasosore, sanggeus toko tutup.”, “Nya di antos Fan.”

Geus kitu mah Yayat amitan ka Irfan. Terus manehna nyetarter motorna. Motor bebek pulas hideung ngabiur ngambah jalan raya Cibaduyut nuju ka kota Cimahi.

Bagian 12

Isukna. Bener bae Irfan teh ulin ka imahna Yayat, ku Yayat teu loba di bawa ngobrol di imah tapi langsung di bawa ka imahna Agus Cangkir. Sabab di imah mah teu laluasa ngobrolna. Pamajikan Yayat ayeuna mah teu panujueun kana laku lampah Yayat anu ngungudag bisnis teu pararuguh teh. Sabab geus karasa ku Nyi Usniah yen bisnis salakina teh ngan ukur meakeun duit nu aya, lain ngadatangkeun duit sailaharna anu usaha atawa bisnis.

Mobil Avansa pulas hideung nu di tumpakan ku Irfan jeung Yayat geus eureun hareupeun imahna Agus cangkir. “Assalamu’alaikum, Kang Agus !” Yayat uluk salam. “Wa’alaikumsalam, aih geuning aya tamu. Mangga ka lebet.” Agus Cangkir mukakeun panto, ngahiap Yayat supaya ngajak Irfan ka jero.

Agus Cangkir mah kebat ka dapur, teu lila balik deui bari nanggeuy baki di eusi ku tilu geulas cikopi anu masih ngebul keneh. Sor Cikopi di asorkeun ka hareupeun yayat sarta Irfan Sumpena.

“Nepangkeun Kang, ieu rerencangan kuring.” Ceuk Yayat ngawanohkeun Irfan. “Raden Irfan Sumpena.” Ceuk Irfan legegna masih kawas baheula. “Agus.” Tembal Agus Cangkir bari nyalaman Irfan.

“Aya naon nya, asa rareuwas ieu teh, teu aya ilapat nanaon nuju wengi tapi ayeuna kadongkapan menak ti kota.” Ceuk Agus Cangkir deui, gancang tumanya ka tamuna. “Kieu ieu teh kang, Kuring keur nyiaran jalma nu bisa narik harta karun atawa harta goib anu mangrupa emas batangan atawa naon wae nu mangrupa barang berharga. Tah ceuk Yayat saurna kang Agus mah seueur kawawuh jalmi pinterna.” Irfan langsung ngabejakeun tujuan dirina.

“Oh rek narik barang...gampang perkawis eta mah Den, teu kedah tebih - tebih. Akang oge sanggup pikeun narikan nu kitu mah. Tah di wilayah paku haji ge seueur emas batangan pa Karno anu di kubur aya kana 10 kilona mah. Urang tarik we ari Aden peryogi mah.” Ceuk Agus cangkir nyanggupan kana paniatan Irfan.

Yayat anu cangcaya, sabab manehna apal yen Agus Cangkir mah ahlina kana ngode nomer SDSB lain kana narikan harta goib, rada mureleng ka Agus Cangkir. “Nu bener Kang ari nyarita teh ?” Ceuk Yayat rada teu panujueun kana caritaan Agus cangkir.

“Tenang bae Yat. Tingali bae engke buktina.” Agus Cangkir ngajawabna teu euleum - euleum. “Ari Akang sanggup mah hayu atuh urang angkat eta emas teh kang.” Irfan haripet, manehna mah percayaeun da ningali tagogan Agus cangkir anu memang kawas dukun. Buuk panjang ngarerewig, janggot panjang sadada, bari begang rengkung kawas nu ahli tatapa.

“Siap akang mah Den, mung bae Aden siap henteu kangge nyumponan syarat - syaratna ? margi eta emas di jaga ku pasukan jin anu di pimpin ku jin iprit. Kangge muka idin koncina nya teu aya cara sanes iwal ku urang kedah di sogok eta nu jaragana.” Ceuk Agus Cangkir bari pepeta.

“Naon wae syaratna teh Kang ?” Irfan tambah panasaran. “Syaratna getih hayam camani, getih gagak hideung, getih embe kendit, Madat turki asli, apel jin nomer hiji, minyak konibasawa, minyak misik hideung, minyak japaron, rujakeun kumplit, kembang tujuh rupa, sulutu garut, tumpeng tujuh rupa, dewegan hejo tina tangkal anu geus umurna 100 taun, arak cina, sake jepang, jeung menyan bodas ti mesir.” Agus cangkir nataan hiji - hiji syarat - sayarat pikeun narik harta gaib.

Irfan Sumpena unggut - unggutan ngaregepkeun, tuluy pok nyarita, “Nyiar barang nu kitu mah hese kacida Kang, kieu we atuh ku akang di etang sabarahaeun piwaragadeunana. Tah kuring nu ngamodalan, akang nu nyiaran barangna. nu penting kuring mah hasil we nu di tuju.”

“Oh nya sae ari kitu mah Den, Camani limalas, gagak genep, embe 15....” Agus cangkir ngutekeun ramo - ramona kawas nu keur ngetang. “Sadayana kirang langkung 100 juta Den.” Ceuk Agus Cangkir sanggeus beres ngitungna.

“Haduh mahal pisan ning Kang, teu bisa kurang eta teh ?” Ceuk Irfan bari olohok bakat ku reuwas, yayat anu ngabandungan oge calangap ngadenge kitu mah. “Eta teh tos di hemat Den, model cinyusu, kembang tujuh rupa sareng nu kira - kira bisa ngala mah teu di etang, da nu awis mah model hayam camani eta eh hargina moal kirang ti 20 juta bari kedah barang siarna ge tebih ka bogor atawa ka garut, teu acan milarian gagak nu pangaosna pasti moal kirang ti genep juta teu acan nu sanes - sanesna. Nya upami Aden teu sanggeum mah teu nanaon teu cios oge.” Jawab agus Cangkir tuluy ngaregot cikopina.

“Ih sanggup kang sanggup, tenang bae, bere waktu we kuring saminggu pikeun nyiapkeun duitna.” Ceuk Irfan ahirna mah nyanggupan. “Moal rugel atuh da Den, ngamodal 100 juta kenging emas puluhan kilo anu hargana ge tangtosna mah triliunan rupiah.” Ceuk Agus cangkir ngayakinkeun Irfan. Atuh lamunan Irfan beuki luhur bae ngapungna, kabayang ku manehna bakal jadi jalama nu berat benghar hartana moal ka etang.

Geus beres ngawangkong saperluna mah Irfan teh amitan balik. Yayat mah teu milu balik, sabab panasaran kana caritaan Agus Cangkir anu pikeun Yayat mah asa pamohalan. “Kang nu bener ntyarita teh, akang teh rek nipu batur kuring ?” Yayat tumanya ka Agus cangkir sanggeus mobil Irfan kadenge rada jauh.

“Eh kasempetan Yat, lain sorangan teh hayang malikeun modal nu leungit, tah ayeuna aya kasempetanana. Urusan kitu kieuna mah keun akang nu ngurus, barina ge lain nipu ieu mah tapi narekah, dina gagalna ge apan aya alesan yen duitna ge di pake sarat lain di dahar ku urang.”

“Tapi nya sarua bae urang teh nipu kang, sabab eta duit pasti moal di balanjakeun saestuna ku Akang.”, “Nya moal atuh Yat pikeun modal mah paling ge beak 3 juta. Getih mah kali menta ka tempat jagal, campuran nu mangsi hideung supaya getihna jadi hideung sarua jeung getih hayam camani. Barina si Irfan teh lain musuh sorangan nu baheula ngarebut Ningrum bebene sorangan, bari ngajuruskeun sorangan jadi beuki nginum jeung awewe. Tah kiwari wancina males kalakuan si Irfan teh Yat.”

Ngadenge kitu Yayat ngahuleng, dendamna ka Irfan ka hudang deui, bari kacampuran ku setan anu ngaharewos yen dirina teh butuh pisan duit, sabab usaha batuna geus bangkrut. Ahirna Yayat nyokot kaputusan nyatujuan kana tipu dayana Agus cangkir. “Nya kuring satuju lah, asal hasilna di bagi dua Kang.”

“Pasti atuh Yat da moal di dahar ku akang sorangan. Tah ayeuna mah kieu, akang boga tilu batang kuningan sari gambar pa Karno, sorangan boga duit teu 500 rebu ?”, “Aya Kang duit kontrakan, naha keur naon kitu ?”

“Kieu Yat, eta batangan kuningan sari ku akang arek di sepuh ku emas rada kandel meueusan. Supaya lamun di cek di gesek ku si Irfan moal kaciri palsu da sepuhanana kandel. Sanggeus di sepuh, ke ku akang rek di kubur handapaeun tangkal caringin nu aya di Paku haji. Tah ke dina waktuna narik emas teh apan kari ngagali di ditu.”

“Lamun tepi ka panggih palsu ku Irfan kumaha kang ?”, “Babari kari sebutkeun aya syaratna nu katinggaleun atawa poho, jadi eta emas rubah jadi kuningan sari. Keun urusan ekol mah bagian akang hehehehehe..”

Duanana ting garakgak sareuseurian bangun bungah naker kituna teh. Geus kabayang ku Yayt jeung Agus cangkir bakal meunang bati gede tina ladang nipu Raden Irfan Sumpena. 

Bagian 13

Gancangna carita, Irfan geus masrahkeun duit 100 juta pikeun waragad syarat - syarat narik emas batangan tea. Nya ku Yayat jeung Agus cangkir eta duit ukur ka pake sajuta, sabab sakabeh sarat di palsukeun, getih hayam camani oge anu di hargakeun puluhan juta ukur make getih hayam sayur anu di campur jeung mangsi hideung. Sesana, duit bati nipu teh di bagi dua ku maranehna.

Cunduk kana waktu pikeun narik emas batangan titinggal pa Karno tea. Peuting juma’ah kliwon kira - kira wanci tengah peuting. Agus, Yayat, Sarta Irfan arindit ka wewengkon Paku haji, teu poho Yayat mawa pacul sadua - dua sasadiaan geusan ngali harta karun.

Reg mobil Avansa bogana Irfan eureun di tungtung wewengkon Paku Haji. Nu tiluan kalaluar bari angkaribung sagala di bawa. Kaayaan mani simpe teu kadenge jangkrik - jangkrik acan.

Agus Cangkir leumpang panghareupna da manehna nu apal jalan, Sup asup ka kebon nu jemet ku tatangkalan, kaayaan tambah caneom, Yayat nyorotkeun batrena nyaangan jalan, Da Agus Cangkir mah leungeuna di pake nyuhun nyiru nu pinuh ku syarat - syarat meungng nyieun manehna jeung Yayat.

Lengkah Agus Cangkir ngarandeg hareupeun hiji tangkal caringin anu lumayan gede, akarna ngarangkadak, pupuringkelan kawas awak oray nu ker kawin. Nu duaan milu eureu. Agus Cangkir nunda nyiru nu di suhuna, pok nyarita, “Di dieu tempatna, Yat amparkeun samak, urang ngamimitian seba yeuh.”

Yayat teu loba omong da geus meunang badami ti anggalna. Samak di amparkeun nu tiluan sila andekak. Agus cangkir nyieun parupuyan. ngeupeul menyan tuluy di purulukeun kana parupuyan, bues kebul bodas melun ka luhur bau menyan nyambuang di sabudeureun eta tempat.

Torolang Agus cangkir mapatkeun jangjawokanana. Jangjawokanana sakapanggihna sabalang bentor, jampe ngusep jampe mandi, tepi ka jampe bebedil ge di baca. Untung bae Irfan mah teu ngartieun kana jangjawokan teh. Sabab manehna mah teu pernah gaul jeung jalma nu ngarti kana jangjawokan. Atuh ukur ngahenen bari ngaregepkeun sawaktu Agus cangkir ngacaprak kaditu kadieu teh.

Beak maca Jangjawokan, Agus cangkir hudang tina silana. Geus wancina urang di bere idin nyokot emas, ngan bae ukur di bere tilu kilo Den.” Ceuk Agus Cangkir bari ngalieuk ka Irfan Sumpena.

“Har janjina kang Agus teh 10 kilo, naha ayeuna ngan ukur 3 kilo ?” Irfan katenjo kurang satuju. “Embena kurang kolot ceunah, kuduna nu umuran dua taun, ieu umurna ukur 10 bulan, da kumaha atuh den, neanganana hese, untung masih manggih ge.” Tembel Agus cangkir bisa bae ekolna teh.

“Keun wae Fan tilu kilo ge mun di jual samiliar satengah, sorangan ukur kaluar modal 100 juta, atuh masih batina ge rebuan tikelna Fan.” Yayat milu mairan, mangaruhan ka Irfan. “Nya keun bae atuh sakitu ge saheulaanan mah, tapi sejen waktu kudu di angkat deui sesa emasna kang.” Ceuk Irfan ahirna leah hatena.

Agus cangkir ngurilingan tangkal caringin tujuh kali, “Tah kali belah dieu Yat !” Ceuk Agus cangkir, nitah ka Yayat bari nunjuk kana satukangeun tangkal kiara. Yayat anu tatadi geus sayaga nyekel pacul, langsung bae ngagali di tempat anu di tunjuk ku Agus cangkir. Irfan mah ukur nyorotan ku batre.

Meunang sawatara waktu ngagali, getruuk !! Pacul ngadu kana barang teuas, Yayat gancang ngorehkeun eta barang, barang ka koreh sihoreng kotak kayu leutik. Eta kotak kayu di angkat ku Yayat.

Kotak kayu di riung ku tiluan. lalaunan Agus cangkir mukakeun panutupna. “Breh di jerona aya tilu batang emas batangan, aya gambar Pa Karno sarta tulisan LM 1kg. Teu sirikna eta emas di rawu ku Irfan. Gancang Irfan ngaluarkeun pangetes emas, eta batang emas satiluna di gesek ku Irfan.

“Asli kabeh ieu mah Kang, Nuhun pisan, kuring bisa beunghar deui ieu mah, Nuhun kang Agus, nuhun Yat.” Irfan Sumpena ajrag - ajragan kawas budak bolon manggih permen. Ari nu duaan ukur ting serengeh bari silih kiceupan.

“Hayu gancang mulang atuh, sok candak emasna Den. Ngan peupeujeuh ulah waka di jual eta emas lamun acan saminggu, tepung deui malam juma’ah minggu hareup.” Ceuk Agus cangkir mere peupeujeuh ka Irfan.

Mobil Avansa nyemprung deui nuju ka Cimahi, Beres nganterkeun Agus cangkir mah, Irfan teh gagancangan balik, hatena lugina sabab geus hasil narik emas goib. Sapanjang jalan Irfan ngaharirung suka bungah, kabayang manehna jadi jalma jegud deui cara baheula sawaktu bapana masih jumeneng.

Kocapkeun Agus Cangkir jeung Yayat anu rareureuh di imah Agus Cangkir. Kopi geus sadia hareupeun meja. “Kang kuduna ngubur teh ulah jero teuing cara tadi, kuring ripuh ngagalina, cangkeng asa potong euy.” Ceuk Yayat anu ngalungsar dina ubin.

“Atuh ari deet teuing mah bisi si Irfan curigaeun Yat, ke jadi mamala weh. Barina wajar we gawe sakitu mah da buruhna ge 48 juta hehehehheehe. Moal aya tukang gali tepi ka gajihna sakitu ukur ngagali tilu meter.” Tembal Agus Cangkir bari nyengir, gap kana kopina tuluy di inum bangun nikmat naker.

“Bener Kang coba tiap minggu kawas kieu, tereh benghar urang teh hahahahhahaha...” Yayat ngeunah seuri, geus poho yen nu di pilampah ku maranehna teh hiji pagawean anu di larang ku ajaran agama sarata undang undang hukum pidana.

Poe - poe saterusna, Yayat jeung Agus Cangkir terus ngalakukeun aksi uka - ukana. Saha bae nu datang, nya di gawean, di tipu ku cara naon bae, aya nu ngagandakeun duit, aya nu narik harta karun, aya oge nu hayang jimat, jeung rea - rea deui macemna.

Lamun aya jalma nu katipu ngajorag, gancang maranehna ngariles, nyarumput, nyingkahan korban - korbana.

Bagian 14

Saha nu melak bonteng, pasti manena bonteng. Saha anu melak goreng pasti bakal meunangna ge kagorengan. Sirib ieu teh pasti tumiba ka sakebeh manusa. Lain ceuk saha, lain ceuk nu ngadongeng, tapi mungguh dawuhan Alloh Ta’Ala dina surah An Nissa ayat 79 :
مَا أَصَابَكَ مِنْ حَسَنَةٍ فَمِنَ اللَّهِ ۖ وَمَا أَصَابَكَ مِنْ سَيِّئَةٍ فَمِنْ نَفْسِكَ ۚ وَأَرْسَلْنَاكَ لِلنَّاسِ رَسُولًا ۚ وَكَفَىٰ بِاللَّهِ شَهِيدًا
Naon wae nikmat nu katarima ku anjeun saestuna anging ti Alloh, sarta naon wae kagorengan nu datang ka anjeun, eta tina (kasalahan) anjeun sorangan. Kami ngutus Muhammad jadi Rasul pikeun sakabeh manusa. Sarta cukuplah Allah anu nyaksi.

Kitu oge lalakon Yayat dina ieu carita. Dimana Yayat geus daek milampah kagorengan, kalangsu deui hirupna, nya kari nunggu bae datangna kagorengan kana dirina.

Ku remen teuing ngalakukeun panipuan jeung Agus Cangkir. Nya tambah remen bae jalma nu jul jol neangan Yayat teh. Tapi Yayat tara aya di imah, jadi hese pisan pikeun di panggihan ku jalma - jalma nu jadi korbana teh.

Tapi sapinter - pinterna bajing ngaluncat, hiji waktu aya ti soledatna. Peuting harita Yayat keur uplek ngobrol di imahna Agus Cangkir. manehna salse suka bungah garumbira da ari wanci peuting mah tara aya jalma nu datang ngadon neangan maranehna.

Tapi teu kanyahoan deui, dua jalma geus ngabedega hareupeun panto, teu uluk salam deui duanana arasup ka jero imah. “Kapanggih siah dukun palsu teh, dasar panipu, pulangkeun duit dewek siah !” Nu pangheulana hahaok teh taya lian Raden Irfan Sumpena. TTeu kadenge gerung mobilna, sabab Irfan ngahaja make taksi bari turun rada jauh ti imah Agus cangkir. “Kuring ge menta ganti rugi, awi buta ti maneh teh palsu, naon awina oge meunang ngelem, kasebelan siah !” Saurang lalaki tengah tuwuh sarua nyentak ka Agus cangkir jeung Yayat.

“Tenang, tenang heula Den, calik heula. Sadayana tiasa di badantenkeun.” Ceuk Agus Cangkir leuleuy. “Tenang kumaha, itu batangan emas kunaon jerona kuningan, rek nipu siah teh ka aing, sia oge sarua sakomplot Yayat !” Ceuk Irfan teu sirikna panona burial buncelik bakat ku ambek.

“Kieu Den, eta batangan emas nya pasti robih sabab ku Aden acan heuleut saminggon parantos di jual kan ? pan saur abdi oge antosan tepi ka saminggon karak eta emas tiasa di ical. Tah ngeunaan awi buta Pa Iwan, apan pa Iwan nyakseni basa di tes di dieu, eta apanan sanes gaduh abdi tapi gaduh Bah Juhro. abdi mah ukur nepungkeun hungkul Bah Juhro sareng pa Iwan. Ke antosan urang telpon bah Juhrona, tenang bae abdi mah teu aya niat nipu sasaha wantun sumpah di samber guluduk pami abdi ngabohong.” Ceuk Agus Cangkir, nyieun alesan, bari wani sumpah sagala.

Nu duaan rada turun amarahna. Irfan memang rumasa geus ngalanggar larangan ti agus Cangkir sabab emas teh isukna ge ku manehna langsung di jual. Kitu oge pa Iwan, da memang bener Bah Juhro nu mawa awi buta teh lain Agus Cangkir. Padahal mah Bah Juhro ge masih komplotanana Agus Cangkir keneh.

Agus Cangkir ngaleos ka dapur, balik deui geus mawa cikopi dua gelas, bari mawa hp nu manehna. Kopi di asorkeun ka Irfan jeung pa Iwan. Terus manehna pura - pura nelpon bah Juhro, “Hp na pareum bah Juhro teh, ke atuh kang ku abdi di susul ka bumina enjing da ayeuna mah tos wengi, bah Juhrona sigana tos pules.” Ceuk Agus cangkir bari nunda hpna dina luhur meja.

“Nu penting mah Kang Agus kudu tanggung jawab, sabab kuring mah moal neangan jurig nu teu kadeuleu. Apalna kuring mah ka Kang Agus, nya kang Agus nu kudu tanggung jawab. lamun tepi duit kuring nu 200 juta teu balik, kang Agus bakal di laporkeun ka pulisi ku kuring.” Tembal Pa Iwan nyedek ka Agus cangkir.

“Sarua kuring ge, lamun eta emas teu di gantian, atawa kuring teu di ganti rugi samiliar, maneh duaan bakal ngaringkuk di pangberokan.” Irfan Sumpena oge ngancam, malah menta ganti rugi.

“Tenang, tenang, abdi siap tanggel waler upami enjing pageto teu aya buktosna, sadaya karugelan bapa - bapa ku abdi di gentosan, tah ieu minangka panjerna.” Agus cangkir ngaluarkeun duit tina keresek anu tadi di bawa bareng jeung mawa hp. Duit 10 gepok di bagi dua ka Irfan jeung Pa Iwan, masing - masing kabagean 50 juta sewang.

“Percanten henteu ka abdi bapa - bapa teh ? abdi mah moal dugi ka nipu ka sasama teh, leuwih hade malarat daripada nipu ka papada urangna. Mangga di laleueut heula kopina bilih kabujeng tiis.” Ceuk Agus cangkir bari seuri leutik.

Nu duaan nampa duit mah rada kaubaran hatena, timbul deui raya percayana ka Agus Cangkir. Duanana gup - gap kana cikopina sewang - sewangan, tuluy di arinum mani ngaleklek, kawantu hawa geus karasa tiris sabab peuting geus rek nyedek ka janari.

Na atuh teu lila Irfan jeung Pa Iwan ngaguling tina korsi, duanana kekejetan, dina bahamna kaluar busa warna bodas campur jeung getih, panona mureleng ka luhur. Gancang Agus cangkir ngadiukan beuteung pa Iwan bari nungkup bahamna maksudna mah bisi ngajorowok menta tulung.

“Tungkup bahamna yat, gancang !” Ceuk Agus Cangkir marentah ka Yayat supaya nurutan cara manehna ka Irfan Sumpena. Tapi Yayat ukur colohok bari hareugeueun. “kang di racun ku akang teh ?” Yayat kalah tumanya ka Agus Cangkir.

“Enya Yat, maneh daek di laporkeun ka pulisi tuluy di bui puluhan taun ? Gancang tungkup bahamna bisi ngagorowok !” Agus cangkir marentah deui. Ngadenge rek di bui mah Yayat teh sieun, gancang manehna nungkup baham Irfan Sumpena anu keur adug lajer sakaratul maut lantaran kopina di campuran racun beurit ku Agus Cangkir.

Ukur lima menitan, Irfan jeung Pa Iwan tiwas di ruang tamuna Agus Cangkir. “Sered ka tukang imah mayitna Yat, omat lalaunan, Kuring ti heula, Agus cangkir gagancangan muru ka tukang. Yayat nurut, manehna ngagusur dua mayit ka tukangeun imah Agus cangkir.

Kasampak Agus Cangkir kakarak beres muka tutup sapiteng, :karadahan heula, cokotan duit jeung hpna Yat !” Ceuk Agus Cangkir bari ngasongkeun keresek hideng urut wadah duit. Dua mayit di karadahan ku Yayat, salian ti nyokot duit anu tadi tea, hp sarta arlojina ge di raradan ku Yayat, di ijikeun kana kantong keresek. Geus kitu dua mayit teh di asupkeun kana sapiteng. Sapiteng di tutup deui, malah di urugan ku taneh supaya teu kaciri urut di buka.

Beres mendem mayit, duanana arasup deui ka imah. Barang hasil jarahan di bagi dua, hp hiji sewang, arloji ge hiji sewang geus kitu pok Agus Cangkir nyarita, “Yat semet ti ayeuna urang duaan kudu nyumput ka jauh, ulah papanggih heula sabab bisi pulisi nyiaran urang. Ke geus aman mah akang ge pasti neangan sorangan.” Ceuk Agus cangkir bari ngelapan kesangna anu juuh maseuhan beungeutna.

“Enya Kang. Kuring rek indit ayeuna keneh, moal waka balik ka imah.”, “Jung geura indit, ati - ati, sing salamet.” Geus kitu mah kencling bae Yayat indit ti imahna Agus cangkir. Teuing rek kamana, teung rek ka saha, nu jelas mah ngajauh ti wewengkon Kebon cau.

Sapuluh poe ti harita, aya berita dina TV sarta Koran, yen Agus cangkir kacerek ku pulisi di wewengkon Gunung halu. Manehna jadi buronan kasus panipuan sarta maehan jalma, anu layona ka panggih di pendem dina jero sapiteng tukangeun imahna. Agus cangkir di ancam hukuman penjara saumur hirup. Pulisi oge masih neangan buronan hijina anu taya lian Yayat alias Alek.

Wanci haneut moyan, di wewengkon Rajamandala kacida endahna, manuk recet di sarada ngabageakeun srangenge nu mancarkeun sinarna mancen tugas nyaangan sakuliah dunya. Di Tengah sasak rajamandala, saurang lalaki geus lumayan kolot keur leumpang lalaunan. Papakeana kucel, buukna kalotor, leungeun katuhuna ngajingjing kantong keresek warna hideung.

Ngadadak ti ujung belah wetan jeung kulon jambatan, mobil pulisi areureun, pulisina jrat - jrut tarurun bari nodongkeun pestol ngepung eta lalaki. “Saudara Yayat cepat menyerah, Anda kami tangkap atas tindakan penipuan dan pembunuhan !” Saurang pulisi nyorowok ngagunakeun toa tina mobilna.

Si lalaki kolot anu taya lian ti Yayat, lumpat muru sisi jambatan, teu antaparah deui manehna ngagajleng muragkeun maneh tina jambatan ka handap kali ciltarum anu sakitu jerona. Yayat nekad maehan dirina daripada kudu ngarandapan deui di bui pikeun kadua kalina.

Lalakon Kalangsu jilid ka 3 renge dugi ka dieu, mugia ieu lalakon tiasa janten eunteung urang sadaya dina raraga ngambah hirup kumbuh di alam dunya. Ki Dalang nyuhunkeun di hapunten boh bilih seueur keneh kakirangan dina medar ieu lalakon. Sakitu anu ka pihatur, urang pendak deui di lalakon anu enggal. Caaag (tamat)