#Hulu iblis Nyi Sukẻsih
Bagian 11
Geus pada satuju mah atuh nu tiluan tẻh laleumpang gancang
ngajugjug ka Kebonna mang Komar. Pa RT leumpang Pang hareupna bari nyorotan
jajalaneun ku senterna, di satukangeunna Mang ajo di tuturkeun ku Juhro.
“Mang naha bener ẻta jurig tẻh bungkelekan?” tanya Pa Rt ka
mang Ajo
“Bener Tẻ, keur naon Emang ngabohong, kacapẻ - capẻ lumpat
ari ukur heureuy mah Tẻ.” Jawab Mang ajo.
“Keun urang hareupan ku kuring Mang, tuman makẻ nyilakakeun
ronda sagala!”
“Mangga tẻ, ari emang mah da teu boga elmu keur
nyanghareupannana.”
Teu kacatur di jalanna srog nu tiluan tepi kasisi kebon Mang
Komar. “Belah mana Mang barudak tẻh?” ceuk Pa Rt ka Mang Ajo “Di umplukan
tangkal kalapa pa Rt.” Jawab Mang Ajo bari nunjuk ka palebah jajaran tangkal
kalapa.
Kakarak gẻ nu tiluan laleumpang deui ngadadak angin datang
ting salẻor, cungungung anjing babaung patẻmbalan. “Duh Tẻ datang deui jurigna
tẻ, kumaha geus kieu tẻ?” Mang Ajo datang kasieunna, manẻhna bibirigidigan ras
ingeut kana rupa kalapa anu aya beungeutan.
“Uing gẻ muringkak yeuh mang, urang balik deui wẻ yu pa Rt,
keu isuk wẻ nẻang barudak mah.” Juhro milu nyarita sabab bulu pundukna ngadadak
ngawidwid asa ngadelan. “Ẻh ulaj kitu Juh, karunya kalah kumaha ogẻ urang kudu
nulungan Samin jeung Dasẻp. Komo pan kuring mah salaku RT tada teuing
masyarakat nganaha – naha lamun seug apal kuring teu nulungan warga anu keuna
musibah.” Jawab Rt bari terus leumpang nuju tangkal kalapa.
Mang Ajo jeung Juhro silih pelong, hatẻna geus humar – hemir
tapi ẻra ka pa Rt lamun kudu jicir lumpat deui cara tadi, antukna pok Mang ajo
nyarita “Juh hayu ah baturan Rt karunya lamun kudu sosoranganan kitu.”
“nam atuh mang ti hareup!” “Nya hayu atuh.” Mang Ajo
leumpang gancang ngudag Pa Rt di tuturkeun ku juhro. Barang Srog nu tiluan
kapalebah umplukan tangkal kalapa. Ngadadak aya sora nu nyikikik seuri di
sambung kunu ngabangingik ceurik, sorana matak kukurayeun.
“Tah Tẻ sora jurigna tẻ!” ceuk Mang ajo bari nyekelan
pigeulang pa Rt. Juhro mah gancang nangkeup ka mang Ajo. Dina kaayaan kitu
gayabag ti luhur tangkal kalapa aya bayangan bodas ngagayabag jelegedeg
bayangan bodas tẻh nangtung di hareupeun nu tiluan, jarakna aya kana tujuh
meterna.
“Tẻ..tẻ...itu itu naon tẻ?” ceuk Mang Ajo bari nunjuk ka
hareup. “Balik ..balik yu ah!” Juhro geus bẻak kawanina, bujurna kokompodan,
tuurna nyorodcod lilinieun. “Tenang Juh tenang mang tenang.” Rt nenangkeun nu
duaan.
Pa Rt ngarahkeun senterna ka arah nu ngajanteng di hareup,
barang brẻh nu nangtung tẻh hiji mahluk anu pikasieuneun. Buukna panjang
ngagebay, bajuna bodas, panonna hideung celong kajero ari lẻtahna ngambay
panjang sabujal, dina sela biwirna kaluar sihung mani ranggẻtẻng sarareukeut.
Gebeg pa Rt ngagebeg, sabab saumur nyunyuhun hulu kakarak
harita nempo jirim anu sakitu pikasieuneuna. Hatẻna mimiti sebẻr kawanina
mimiti kalindih ku rasa sieun. Tapi sanajan kitu pok Rt maksakeun nyarita.
“Hẻh mahluk anu ngajanteng, anjeun ulah ganggu ka kami jeung
ka urang lembur Citiis. Napsi – napsi baẻ hirup babarengan tapi ulah tepi ka
nyingsieunan atawa deleka ka warga lembur.”
“hihihihihihi hihihihihihi
hihihihihi....ngaula ngoal nganggu ngasal ngaranjeun ngahormatan ngana
ngaula, ngiap ngalam ngumaah ngadiakeun ngusuguh ngapuratina hihihihi hihihihihi...”
Si mahluk anu taya lian Ki Gulutuk cengir anu ngarubah
wujudna nẻmbalan, sorana ngirung matak kukurayeun. Siluman samodẻl Ki Gulutuk
mah ka asup siluman sakti sabab manẻhna bisa mancala putra mancala putri bisa
ngarubah wujud sakahayang manẻhna.
Ngadẻngẻ sora Ki Gulutuk cengir Juhro mah mẻhmẻhan
ngabecir tapi kaburu di cekel ku Mang
Ajo. “hay..hayu lu..lu..lumpat ẻy ẻta
sorana mani ki ki kitu itu beungeutna mang ah urang balik wẻ hayu mang!”
“Jempẻ Juhro urang tingali ketakna Pa Rt !”
“Tapi da si ..si ..sieun mang.. duh bulu punduk mani kandel
bari jeung panas tiris kuring mah mang..”
“Meunggeus jempẻ urang bandungan heula Juh!”
Juhro ahirna jempẻ sanajan bari ngayekyek kasieunan satẻkah
polah manẻhna nahan parasaan sieunna.
Pa Rt maju dua lẻngkah pok nyarita deui “Hẻy bangsa dedemit,
kami bangsa manusa pantang kudu nurut ka bangsa anjeun. Komo anjeun hayang
nyusahkeun bangsa kami mẻmangna murah susuguh kumplit sapuratina tẻh. Teu kami
moal nurut ka anjeun, Mending gẻ anjeun geura ingkah ti dieu ulah balik kadieu
dieu deui.”
“Hihihihihihi ngoal ngurut nga, ngamun ngaula ngaksa
nganjeun ngarẻk ngaon hihihihihi..!”
“ẻẻh bandel jurig tẻh kapaksa kuring kuring makẻ jalan
kakerasan!”
Pa Rt kunyam kunyem mapatkeun jampẻna. Dua dampal leungeunna
di tiuo tuluy di dorongkeun ka arah Ki gulutuk cengir dua ranggeum angin panas
kaluar tina dua dampal leungeun Pa Rt
saterusna muru ka arah badanna Ki Gulutuk cengir.
Pa Rt mẻmang rada bisaan kana ẻlmu kabatinan, Mun aya jalma
anu kasibat atawa kasarumahan kasurupan warga Citiis mang sok mẻnta tulungna tẻh
ka Pa Rt. Angin nebak ka awakna Ki Gulutuk, Ki Gulutuk ukur seuri manẻna teu cẻcẻl
bocẻl ukur bajuna anu ngẻlẻbẻt katebak ku angin serangan pa Rt.
“Hihihihihihi ngari ngia
ngagaonan ngah ngakẻ nguap ngiup ngagala, ngatak ngẻtẻk ngaẻ hihihihihi” ceuk
Ki Gulutuk bari nyikikik seuri. Pa Rt olohok bengong sabab biasa mah jurig nu
katibanan ku ajiannana tẻh bakal tutung sakujur awakna tuluy ngaocẻak kabur ka
jauh. Tapi Ki Gulutuk mah kalahkah seuri bari teu kunaon – naon.
“Cilaka, lain jurig biasa ieu mah, pasti bangsa Jin atawa
Siluman anu luhur ẻlmuna. Kudu kumaha aing ngalawanna” Gerentes hatẻ pa Rt
kawanina mimiti lẻẻh.
“Ngayoh ngaju ngeui nganusa hihihihihi..” Ki Gulutuk cengir
kalahkah nangtangan hayang di serang ku pa Rt.
“Teu pikir panjang pa Rt ngabelesat ka arah Ki Gulutuk bari
peureupna ngadius kana dada Ki Gulutuk. Ukur sasẻnti deui teunggeulan pa Rt rẻk
tepi, ngadadak wukud Ki Gulutuk ngaleungit. Pindah jadi aya di gigireun Pa Rt.
“Pa Rt tambah nafsu manẻhna hut hẻt ngaluarkeun jurusna
nyehcer badanna Ki Gulutuk cengir. Tapi tetep cara tadi, tiap rẻk serangan Pa
Rt rẻk keuna kana sasaran ngadadak wujud musuhna ngiles pindah tempat.
Pa Rt jadi capẻ
sorangan napasna ngahẻgak, bajuna juuh ku kẻsang. Keur kitu hiuk jeduk aya hiji
serangan kilat ti Ki Gulutuk cengir anu neumbrag kana dada Pa Rt.
“Uaduuuh!” cleng Badan pa Rt mecleng aya kana dua tumbakna.
Pamiarsa sadaya satumbak tẻh nyaẻta tilu koma tujuh tujuh senti. Aya ogẻ anu
nyamikeun satumbak sareng sabata, ẻta tẻh lepat marga ari sabata mah opat belas
meter persegi.
Mang Ajo jeung Juhro muru ka Pa Rt anu nyangsaya handapeun
tangkal jambu. “Haduh beurat jurig ieu mah mang ajo, rada sakti jurigna!” ceuk
pa Rt bari nguniang hudang.
Keur kitu cikikik Sora nu seuri nyikikik kadẻngẻ deui, Nu
tiluan malik ka arah Ki Gulutuk anu ngajanteng teu jauh tinu tiluan. “Nu tiluan
olohok ningali sirah Ki Gulutuk anu leupas tina badana. Sirah Ki Gulutuk
ngalayang bari jajantung, hatẻ, peujit ngarambay kabawa ngalayang ku sirahna ki
Gulutuk.
Sirah ki Gulutuk ngalayang ngadeukeutan ka Pa Rt, mang ajo,
jeung Juhro, bahamna kutap kẻtap katẻmbong sihungna anu ranggẻtẻng baseuh ku
getih. Ningali kitu Pok pa Rt nyarita kanu duaan, “mang Ajo, Juhro, urang
lumpat balik ka imah sẻwang sẻwangan, bahaya kaya kieu mah, keun isukan urang tẻang
si Samin jeung dasẻp mah, hayu lumpat!”
Berengbeng baẻ pa Rt lumpat miheulaan. Mang ajo rẻk lumpat
tapi calanana di betot ku Juhro, atuh bret porosot calana mang ajo pegat tali
kolorna. Calanana morosot bujurna katẻmbong kamamana. “Jur jur jurig tulung!”
Mang Ajo nyangkanacalanana tẻh di betot ku jurig, Berengbeng mang ajo lumpat
sataker tanaga bari nyekelan calanana anu kadodoran.
Dorokdok brug kadẻngẻ pager kebon anu ngaborobot di tabrak
ku Mang ajo. Ari Juhro mah teu kuat lumpat sabab ti tatadi gẻ tuurna geus
karasa leuleus bakat kunahan kasieun.
Atuh sawaktu sirah Ki Gulutuk ngadeukeutan tẻh manẻhna ukur
ngayekyek bari calawak kasima nempo jurig hulu anu sakitu pikasieuneunnana. Lẻtah
panjang jurig hulu ngalẻtakan pipi kẻnca katuhu Juhro.
Atuh puguh wẻ Juhro tambah sawan, beungeutna pias, bujurna
brat bret brot hitut, calanana mah geus jemblong titatadi. Lenggerek Juhro
ngalenggerek kapiuhan teu kuat nahan kasieun.
Songeng MP3/MP4 klik di handap
