Paséa Waé Jeung Salaki, Via Nékad Maéhan Manéh.

Pangandaran – Sapucuk surat sarta sajumlah barang anu di duga bogana Via (26), kapanggihan dina mumunggang obyék wisata Batu Hiu, Kabupatén Pangandaran, Jawa Barat, senén (28/1/2019). Surat téh eusina, ngaran, alamat, sarta alesan niat maéhan manéh anu di duga di tulis ku éta awéwé.

Kaayaan Via can katohian tepi ka kiwari. Kanit Réskrim Polsek Parigi, Aiptu Ajat Sudrajat can bisa mastikeun, naha korban bener – bener ngalakukeun aksi maéhan manéh atawa henteu. “Kami masih ngalakukeun panaluntikan, lamun bener luncat ka laut, ombak mémang keur badag, jadi rada hésé pikeun nyiaranana. Tapi pihak kami geus ngabéwarakeun ka warga bisi aya nu manggihan.”

Ajat mertélakeun, surat jeung barang bukti  mangrupa tas, sapatu, sarta duit 15 rébu, kapanggihan ku warga anu rék nguseup, sakitar pukul 10.00 tadi isuk. Dina jero surat aya pesen ngagunakeun bahasa sunda, eusina  ; ‘'Anu mendak tas jeung sendal namina Via urang kemplung Rt 06 Rw 04. Terpaksa bunuh diri da di imah oge pasea wae jeung salaki.”

Dumasar éta surat, pihak kapulisian geus nyalusur ka pihak kulawarga, ngan baé can meunang katerangan anu jéntré, sabab pihak kulawarga masih reuwas manggih béja samodél kitu. Numutkeun katerangan pihak kulawarga ceuk Ajat, korban ngabogaan panyakit kambuhan, sarta mémang hubungan jeung salakina henteu harmonis.