Hulu Iblis Nyi Sukesih Bagian 4

#Hulu Iblis Nyi Sukẻsih

Bagian 4

Karangan Ki Dagar

 Gancangna carita saminggu geus kaliwat malam minggu nu ditunggu geus ngurunyung ngaganti malam juma’ah. Wanci tengah poẻ geus ngiser ka tangangẻ, panonpoẻ masih morẻrẻt, hawa karasana mani nyongkab.

 

Di Imahna Bah Kanta Hẻndi diuk di tepas bari nanggeuy gado. Di gigireunna cikopi nyanding. Dibaturan ku kulub hui. Tisaprak wawuh jeung Nyi Sukẻsih pagawẻan Hẻndi ukur huleng jentul. Loba malaweng. Ari nu jadi pikiran taya deui iwal ti Nyi Sukẻsih.

 

Teusirikna mun beurang suda kana dahar mun peuting tara bisa sarẻ, sabab rurupaan Nyi Sukẻsih sok ngalangkang baẻ dina kongkolak panon. Jang Hẻndi kapidangdung, kajamparing asih kapeuntang asmara gama.

 

Keur ngahuleng kitu, punduk Hẻndi aya nu nepak. Bari ngarẻnjag Hẻndi malik katukang. Brẻh Si Odoy keur nyẻrẻngẻh, kancing bajuna di buka dadana ngaliglag ngoprot kẻsang. “Ah akang mah sok ngareureuwas!”

 

“Atuh da ti tatadi tẻh katempona ukur ngahuleng baẻ, ulah loba huleng jentul Jang, kamari gẻ si jali loba ngahuleng tẻh paẻh hẻhẻhẻh.” Ceuk Si Odoy teu poho bari ngahẻhẻh. “Ah si jali mah ngahuleng gẻ keuna ku to’un nya pantes paẻh gẻ, na ari akang nyaruakeun kuring jeung hayam atuh!” tẻmbal Hẻndi rada baeud.

 

“Ari ujang ngahuleng kunaon atuh? Ngahuleng ku to’un atawa emut kanu geulis urang Citiis hẻhẻhẻhẻ?” Si Odoy kadon ngagonjak ka Hẻndi. “Ah akang mah baku ari geus ngoconan tẻh.” Hẻndi beuki baeud.

 

“Ih da bener atuh supaya gampil nyiar ubarna. Mun ku to’un akang kari ngarẻndos jahẻ jeung batrawali, komo mun kunu geulis urang citiis mah babari pisan jang hẻhẻh.”

“Emang naon ubarna kitu Kang mun ku urang Citiis.” Hẻndi rada panasaran ngadẻngẻ omongan si Odoy tẻh. “Nya gampil atuh jang. Pan ayeuna poẻ saptu kẻ peuting malam minggu, kari apẻlan wẻ atuh ka imahna da teu jauh ieuh. Da pasti gering nguyung ujang bakal cageur lamun geus panggih jeung Nyi Sukẻsih anu geulis hẻhẻhẻh..”

 

“Ah ẻra kang.”

“Makẻ jeung ẻra, apan jinisna gẻ geus narima, kawas nu geus pasrah siap di tikah. Kiwari Ujang kalahkah ẻra, hirup mah ulah ngagedekeun teuing ka ẻra atuh jang matak susah hẻhẻhẻh.”

 

“Nya ẻra atuh kang maẻnya kuring nyolonong kaitu sorangan.”

“Alah rẻk nungguan Nyi Kẻsih datang nyolonong kadieu! Tepi ka munding dikamẻja gẻ moal kajadian aya awẻwẻ nyampeurkeun ka lalaki atuh jang, barina pan bakal di anteur ku akang. Jadi teu kudu makẻ ẻra sagala hẻhẻhẻh.”

 

Padahal mah jaman kiwari mah tibalik nya pamiarsa sugri kaum dangu. Ayeuna mah justru seueur istri anu nyampeur – nyampeurkeun ka lalaki. Balukarna seueur anu melendung teu aya bapaan. Aki percanteun sadaya pamiarsa di dieu mah balageur sadayana ogẻ.

 

“Iraha atuh ka Citiisna Kang?”

“Ba’da magrib urang indit ka Citiis pikeun nepungan Nyi Sukẻsih Jang, datang kaitu pan can pati peuting, da ari peuting teuing mah bisi kaburu sarẻ nyi mojangna gẻ.”

“Enya ngan bẻbẻja ka abah mah ulah bẻbẻja ulin ka Nyi Sukẻsih Kang.”

“Siap ngartos akang gẻ jang, urang bẻbẻja wẻ rẻk ulin ka imah mang Encẻ rẻk diajar nyieun kecrik, pasti si abah mah ngidinan hẻhẻhẻh.”

 

Si Odoy ngarongkong geulis cikopi anu katingalina pinuh kẻnẻh “Akang mẻnta cikopina nya jang?” Hẻndi ukur unggeuk manẻhna mah ngaragamang kana kulub hui. “Halah cikopi tẻh mani baleuy kieu jang mani tiis.”

 

“Cikopina atuh da ukur di pelong lain di inum hẻhẻhẻh.” Gap si Odoy kana kulub hui dua siki sanggeus di pesek kulitna langsung di selewegkeun duanana sakaligus.

 

Kocapkeun Peutingna. Sanggeus bẻbẻja ka Bah Kanta nu jadi bapana. Hẻndi jeung Si Odoy indit ti imah nuju ka lembur Citiis. Ari bari di pakẻ ngobrol mah lumampah tẻh teu karasa. Hẻndi jeung Odoy geus anjog ka lembur Citiis.

 

“Lebah mana kang imahna Nyi Sukẻsih tẻh?” ceuk Hẻndi tumanya ka Si Odoy. “Gampil jang urang nanya wẻh ka warung kopi tuh, kabeneran aya warung hẻhẻhẻ.” Tẻmbal si Odoy bari nunjuk ka hiji warung nu masih buka. “Nya hayu atuh kang.” Duanana leumpang nuju ka warung nu di tunjuk ku si Odoy.

 

“Mangga Dẻn palay naon?” Nu boga warung awẻwẻ tengah tuwuh haripeut ngabagẻakeun Hẻndi jeung Odoy nu kakarak gẻ diuk dina bangku panjang nu aya di hareup warung. “Cikopi manis dua bi.”Jawab Hẻndi.

 

Si Bibi nu boga warung gancang ninyuh cikopi tuluy sor di asorkeun ka hareupeun Hẻndi jeung si Odoy. “Mangga Dẻn, lalawuhna mah nyandak nyalira wae nya , aya comro, goreng cau, rarawuan sareng katimus.” Ceuk Si Bibi bari ngiserkeun piring nu di eusi ku rupa rupa kadaharan nu bieu di tataan ku manẻhna.

 

“Tah ieu bi karesep kuring mah hẻhẻhẻhẻ.” Si Odoy gap kana rarawuan tuluy di samuilkeun di gayeum bangun nikmat naker. Rarawuan tẻh kacang gajih atawa kacang hẻjo anu geus di kulub tuluy di galo ku tarigu terus di gorẻng.

 

“Bi puntẻn badẻ naros, dupi bumina Nyi Sukẻsih palih mana nya hẻhẻhẻh?” Ceuk Si Odoy tumanya ka Si Bibi bari terus gaganyeum. “Oh bumina Nyi Sukẻsih. Di Kalẻr di sisi lembur kin aya bumi rada mencil tah ẻta bumina tẻh. Payuneunna aya tangkal buah Dẻn.” Jawab si Bibi langsung ngabejakeun pernahna imah Nyi Sukẻsih.

 

“Oh sisi lembur bumina tẻh Bi hẻhẻhẻ.”

“Muhun sisi lembur Dẻn. Badẻ nganjang nya Dẻn ka Nyi Sukẻsih.”

“Ah biasa bi urusan anak muda hẻhẻhẻ.”

 

Sanggeus wareg jajan Hẻndi jeung Odoy leumpang deui nuju ka sisi lembur belah kalẻr. Jog ka sisi lembur katempo aya imah bilik hiji mencil di hareupeun imahna aya tangkal buah  harumanis. “Tuh itu sigana jang da ciri cirina sarua pisan jeung nu diomongkeun ku si bibi tadi hẻhẻhẻh.”

 

“Enya sigana ẻta kang hayu atuh kang urang kaitu.”

 

“Sampurasun punten .” Hẻndi miheulaan uluk salam da bisi kapiheulaan si Odoy mah kurang mernah sabab pasti di tungtungan ku ngaheuheu. “Rampẻs!” nu ngajawab tẻh sora dua lalaki. Panto imah ti tadi gẻ teu di tutup mẻlẻngẻ satengahna.

 

Lol dua urang lalaki ngelol tina panto nu hiji mah ngora kẻnẻh pantaran umurna jeung Hẻndi papakẻanna ginding ari nu saurang deui geus rada umuran beungeutna bosongot budi amprotan kumisna baplang sangga dulang.

 

“Arẻk ka saha hah?” Jajaka ginding jol tumanya bahasana garihal matak nyentug kana hatẻ.

Si Odoy jeung Hẻndi silih pelong. Tapi pok si Odoy anu ngajawab “kami duaan rẻk nganjang ka Nyi Sukẻsih, Aya Nyi Sukẻsihna hẻhẻhẻhẻh.”

 

“Anjeun sahana Nyi Sukẻsih?” Si jajaka tumanya deui angger bahasana kawas nu

“Ah lain sasahana ukur babaturanna emang anjeun sahana kitu hẻhẻhẻh?” Si Odoy malik nanya teu poho bari ngahẻhẻh.

 

“Ari ngajawab pananya batur tẻh anu bener anu sopan ulah bari ngahẻhẻh kitu, sarua jeung ngahina ka dẻwẻk deuleu, bisi can apal yeuh kuring nu ngarana Dẻn Sarja Sumadinata ti Cihẻrang.”

“Hẻhẻhẻhẻ ari hayang di jawab sopan nya atuh nu sopan nanyana baraya ulah bari jeung peupeuleukeuk kita. Wawuh gẻ acan, panggih gẻ karak ayeuna tapi sorangan kawas nu ngẻwa ka kami duaan hẻhẻhẻ.”

 

Keur adu catur kitu torojol Nyi Sukẻsih datang ti pawon bari nanggeuy baki di eusi ku citẻh jeung gorẻng sampeu. Kawasna mah rẻk nyuguhan tamu anu duaan. “Aẻh geuning aya kang Hẻndi sareng Kang Odoy. Mangga kalebet kang.” Nyi Sukẻsih darẻhdẻh ngabagẻakeun ka Hẻndi jeung Si Odoy.

 

Dẻn Sarja jeung mang Ewok badẻgana olohok bari ambeuk sabab geuning Nyi sukẻsih bẻda budina ka manẻhna jeung ka Hẻndi. Teu cara ka Hẻndi ka manẻhna mah tadi gẻ nu nyampeurkeun kalahkah Ma yayah. Kaluar sotẻh Nyi sukẻsih sanggeus di gelendeng ku Ma yayah supaya daẻk nyanghareupan tamu.

 

“Dupi ieu nu duaan tẻh saha nyai dulur nyai atanapi euh...” Si Odoy teu kaburu nganggeuskeun caritaannana sabab kaburu di tẻmpas ku Dẻn Sarja. “Kuring calon salakina Nyi Sukẻsih anjeun arẻk naon?”

 

Si Odoy olohok tuluy malik melong ka Hẻndi jeung Nyi Sukẻsih. “Sanẻs sasaha Dẻn Sarja mah Kang Odoy, mung amengan baẻ ka dieu gẻ.” Ceuk Nyi Sukẻsih. “Oh ieu kabogoh nyai tẻh, jalma ieu anu matak nyai nolak kana lamaran akang tẻh. Tos apal ayeuna mah, Mang Ewok hayu balik!” Ceuk Dẻn Sarja bari lẻos indit ti heula di tuturkeun ku Mang Ẻwok badẻgana. - Hanca

Dongeng mp3 mp4 klik di handap

Hulu Iblis Nyi Sukesih Bagian 3

 

#Hulu Iblis Nyi Sukẻsih

Bagian 3

Karangan Ki Dagar

 

Srog Si Odoy tepi ka hareupeun Nyi Sukẻsih. Sẻrẻngẻh manẻhna seuri tuluy pok nyarita “Nuju naon Nyai, geuning nyalira baẻ di dieu, henteu ngiring damel sareng nu sanẻs hẻhẻh hẻhẻh..?”

“Henteu, ieu kakeureut ku ani – ani kang. Dupi akang tẻh saha nya?” Nyi Sukẻsih malik nanya ka Si Odoy

 

“Nami akang mah Odoy Nyi, urang dieu asli hẻhẻh hẻhẻhẻh.”

“Oh paranti nyikat waos tẻa sanẻs?”

“Ih sanẻs ẻta mah odol atuh nyai, naha kalahkah ngabodor nyai mah hẻhẻ hẻhẻhẻh..”

“Atuh da kang Odoy mah datang datang jol hahah hẻhẻh sapertos nu cunihin.”

“Akang mah jalma bageur tara sok cunihin sumawona ngaheureuyan istri mah, komo ka istri anu geulis kawas nyai mah moal kumawantun ngaheureuyan Nyai hẻhẻh hẻhẻh. Ari perkawis ngahẻhẻh mah tos pangadat Nyi, sigana urat seuri akang aya nu konslẻt hẻhẻh hẻhẻhẻh...” Ceuk Si Odoy cungar cengir gumasẻp bari nyonyoo golep.

 

Nempo kalakuan si Odoy  Nyi Sukẻsih milu seuri, hatẻna asa kahibur teu ngalamun teuing cara tadi. “Nyai mah licik nya hẻhẻh hẻhẻh..”

“Licik naon ari akang sok teu pupuguh kitu?” Nyi Sukẻsih kerung teu ngarti kana maksud ucapan si Odoy “Enya licik, ari nyai apal ka ngaran akang tapi kang mah teu apal ka nami nyai, pan licik kitu tẻh Nyi hẻhẻh hẻhẻh...”

“Ok heuheuheu, hoyong terang nami abdi, abdi mah Sukẻsih kang ti Citiis.” Jawab Nyi Sukẻsih bari seuri.

 

Si Odoy mani ngalenyap ningali nu geulis seuri tẻh, “Beu lamun seug lain Jang Hẻndi nu hayangeun, di tikung ku aing da, ah dasar lain milik.” Ceuk gerentes hatẻna si Odoy.

“Sareng saha kadieu Nyai, sareng carogẻ, atanapi sareng bẻbẻnẻ hẻhẻh hẻhẻhẻh?” Ceuk Si Odoy naluntik hayang nyaho Nyi Sukẻsih tẻh naha masih lalagasan atawa geus aya nu boga.

 

“Sareng pun biang kang, da abdi mah masih nyalira kang teu acan gaduh carogẻ.”

“Oh teu acan gaduh carogẻ ari kabogoh mah tos gaduh meureun hẻhẻh hẻhẻhẻh?”

“Teu acan kang, nya ari nu bogoheun  mah seueur tapi abdina teu acan aya anu sreg.”

 

“Tah tah tah kaleresan sobat akang ogẻ sami lalagasan sami teu gaduh kabogoh, nya kasep deuih gagah lah cocok lamun seug ngahiji sareng nyai mah anu geulis, nurub cupu nu geulis nyanding nu kasẻp hẻhẻhẻh...”

 

“Maksud akang tẻh kumaha ieu tẻh, naha badẻ ngajodokeun abdi sareng saha?” Nyi Sukẻsih can ngartieun kana maksudna si Odoy. “Kieu Nyai, Nyai tẻh kẻnging salam ti hiji jajaka kasẻp tur gandang, namina Dẻn Hẻndi. Anjeuna ti mimiti ninggal Nyai jol cop baẻ kana manahna. Tuh itu jalmina anu nuju calik dina batu hẻhẻh hẻhẻh.” Ceuk Si Odoy bari nunjuk ka arah Hẻndi anu masih diuk dina batu nungguan si Odoy.

 

“Ih naha sanẻs jinisna anu kadieu kang?”

“Eh Dẻn Hẻndi mah jalmina isinan, Kin gẻ kadieu pami salamna di tampi ku Nyai mah. Kumaha di tampi henteu hẻhẻhẻhẻh?”

 

“Kẻ kang Odoy, abdi badẻ naros hẻula, dupi Dẻn Hẻndi tẻh nami asli biasa atanapi mẻmang gaduh turunan mẻnak?” ceuk Nyi Sukẻsih mimiti sifat pipilihna kaluar. Si Odoy teu waka ngajawab di tanya kitu tẻh, manẻhna rada bingung naha kudu nyarita saayana atawa ngabohong. Ari rẻk jujur bisi di tampik, nya si Odoy ahirna milih rek ngabohong, pikirna keun baẻ da engkẻ ogẻ ari geus pada bogohna mah apaleun sorangan.

 

“Dẻn Hẻndi tẻh turunan mẻnak pajajaran Nyai, ngan anjeuna mah teu resepeun di adẻn adẻn tẻh da anjeuna mah jalmana henteu sombong. Akina tẻh baheulana wadana di Sumedang tah ku sabab perang jeung walanda nya ngungsi ka garut anu ahirna tumetep di Cimangantẻn hẻhẻh hẻhẻh” Ceuk Si Odoy teu kireum kireum ngawadulna tẻh.

“Kutan turunan mẻnak Dẻn Hẻndi tẻh? Pami turunan mẻnak meureunan beunghar kang loba pakayana?” Nyi Kẻsih terus naluntik. “Atuh puguh Nyi. Sawahna hẻktaran, kebona rarakitan, domba, hayam mah teu ka ẻtang, pokona mah rajakayana bru di juru bro di panto ngalayah di tengah imah lain caturkeuneun nyai, pan akang kadieu gẻ di piwarang ngaroris sawahna anu palih kulon tuh anu palih ditu hẻhẻh hẻhẻh.” Jawab si Odoy bari nunjuk kapasawahan belah kulon Si Odoy ngabohongna teu euleum euleum.

 

Ngadẻngẻ katerangan  kitu ti si Odoy Nyi Sukẻsih olohok. Kabayang ku Nyi Sukẻsih lamun seug manẻhna ngadahup ka Dẻn Hẻndi tada teuing bagjana, Nya kasẻp nya beunghar, “Bakal senang hirup aing tẻh moal cara ayeuna kudu buburuh derep sagala. Butuh nanaon gẻ kari tutunjuk kawas haji euis.” Kitu galẻcokna hatẻ Nyi Sukẻsih.

 

“Ẻh ari nyai kalahkah olohok bengong, kumaha ieu tẻh naha bakal di tampi atawa moal salam ti dẻn Hẻndi tẻh? Karunya itu ngantosan hẻhẻh hẻhẻh..” Ceuk Si Odoy ngagebah lamunan Nyi Sukẻsih. “Atuh di tampi kang, di tampi pisan, sanggemkeun ka Dẻn Hẻndi bilih badẻ kenalan mah abdi ngantosan di dieu.” Kitu jawan Nyi Sukẻsih, paromana bẻar marahmay sabab ngabayangna bakal boga kabogoh jalma jegud turunan mẻnak.

 

“Nya nuhun ari di tampi mah, akang permios heula, badẻ ngadugikeun kabar gumbira ka Dẻn Hẻndi hẻhẻh hẻhẻh.” Ceuk Si Odoy cengkat tina nagogna tuluy leumpang nyampeurkeun ka Jang Hẻndi.

 

Bari surungah sẻrẻngẻh Si Odoy nyampeurkeun ka Hẻndi. “Kumaha kang?” ceuk Hẻndi tumanya ka Si Odoy. “Kumaha naon ari Ujang?”Si Odoy kalah malik tumanya. “Ih atuh ẻta hasil henteu? Kumaha?” “Nya ari tadi mah kawas nu teu butuh Ujang tẻh, ari ayeuna mani haripeut kitu hẻhẻhẻhẻh.”

 

“Kẻ heula jang santaaaai, udud heula, cing mana udud tadi tẻh?” ceuk Si Odoy bari namprakeun leungeunna. Hẻndi ngusiwel kana saku bajuna song udud di bikeun ka si Odoy. “Sakalian atuh jang jeung kayu apina da akang mah lain naga nu bahamna ngaluarkeun seuneu atuh hẻhẻhẻhẻ.”

 

Hẻndi ngusiwel deui song kayu api di asongkeun ka si Odoy. Si Odoy salsẻ naker udud di selapkeun kana biwirna nu nyameuh tuluy kayu api di hurungkeun di pakẻ nyundut udud. Buel – buel serebung haseup roko nyerebung tina liang irung si Odoy.

 

“Geura atuh kang mani kalẻkẻd pisan atuh!” ceuk Hẻndi hatẻna geus teu sabar hayang ngadẻngẻ bẻja ti si Odoy. “Sabar atuh jang sabar, kagok yeuh keur ngeunah udud hẻhẻhẻhẻh.” Tẻmbal Si Odoy teu poho bari ngahẻhhẻhẻh.

 

“Yeuh tah udud kabẻh keur akang asal gancang nyarita.” Hẻndi geus apal pisan kana panyipatan sobatna anu beuki pisan kana udud. “Coba titatadi Jang meureun akang tẻh langsung laporan hẻhẻhẻh.” Ceuk Si Odoy bari nampanan udud ti Jang Hẻndi.

 

“Kieu Jang kang tẻh bieu ngobrol jeung mojang geulis tẻh. Intina mah salam ti ujang di tarima pisan mun palay kenalan di antos saurna di handap tangkal jambu. Jig kari nyamperkeun kaitu di jamin bẻrẻs lah hẻhẻhẻhẻh.” Jawab si Odoy bari serebung serebung miceun haseup tina irungna.

 

“Nu bener kang ulah heureuy ah?”

“Ih ari ujang teu percaya, na iraha atuh akang ngabohongan ujang hẻhẻhẻh..”

“Enya ngabohongan mah tara ngan ngaheureuyan remen.”

“Sing percaya pokona mah di tarima gancang kaitu, kẻ kaburu balik deui nu geulisna.”

“Kẻla ngaranna saha kang ẻta wanoja tẻh?”

“Ngaranna Nyi Sukẻsih, urang citiis jang hẻhẻhẻh.”

 

Hẻndi nguniang hudang, tuluy leumpang lalaunan nyampeurkeun Nyi Sukẻsih. Srog kahareupeun Nyi Sukẻsih, Nyi Sukẻsih malẻdog ku imut ngagelenyu. Seblak hatẻ Hẻndi nyeblak, saumur nyunyuhun hulu kakarak harita manggihan imut anu sakitu kareueutna.

 

Gẻk Hẻndi diuk gigireun Nyi Kẻsih tapi rada anggang meueusan. “Euh euh Nyai nepangkeun akang Hẻndi dupi Nyai Nyai..” “Abdi Sukẻsih Kang.” Sora Nyi kẻsih mani halimpu kadẻngẻna ku Hẻndi. “Hapunten sobat akang nya anu bieu, pasti anjeuna ngaheureuyan nyai.” Ceuk Hẻndi sorana rada haroshos nahan parasaan hatẻna.

 

“Teu sawios wios kang, malah kahibur abdi mah ku kang Odoy tẻh, jalmina lucu.”

“Muhun nuhun atuh ari Nyai henteu bendu mah ka kang Odoy. Hampuraeun heureuyna sok kamalinaan kang Odoy mah.”

Saterusna mah Hẻndi jeung Nyi Sukẻnah uplek ngobrol kawas kawas geus wawuh lila.

 

Malah Hẻndi geus pahet janji yẻn manẻhna rẻk nganjang ka imah Nyi Sukẻnah di Citiis. Nyi Sukẻnah gumbira sabab manẻhna mah ngabayangkeunna Yẻn bakal boga kabogoh jalma jegud, sabisa – bisa mah ulah tepi kalepas hẻndi tẻh, kudu jadi salakina. -Bersambung

Dongeng mp3 mp4 pencet klik di handap

 

Hulu Iblis Nyi Sukesih Bagian 2

 

#Hulu Iblis Nyi Sukesih

Bagian 2

Karangan Ki Dagar

 

Gancangna carita. Isukna rebun – rebun kẻnẻh Ma Yayah jeung Nyi Sukẻsih geus indit ti imahna. Inditna babarengan jeung rombongan urang lembur Citiis anu rẻk ngahaja buburuh derep di cimangantẻn.

 

Rombongan tẻh aya kana sapuluh urangna, lolobana mah awẻwẻ, lalakina mah ukur tilu urang, ẻta gẻ nu dua mah masih jajaka tanggung. Ukur mang Tahrid lalaki kolotna tẻh minangka katua rombongan.

 

Ti lembur Citiis ka Cimangantẻn tẻh jarakna teu pati jauh ukur kahalangan ku dua lembur. Lamun ku leumpang gancang mah dua jam gẻ geus tepi ka Cimangantẻn tẻh. Tapi dasar nu lumampahna lolobana awẻwẻ bari sapanjang jalan ngarobrol nya tepi ka Cimangantẻn tẻh geus rada beurang.

 

Mang Tahrid langsung ngeprak rombongan ka sawah. Jol anjog ka pasawahan lembur Cimangantẻn. Sawah upluk aplak lega satungtung deuleu, parẻna mani geus karonẻng, mẻmang geus wancina pikeun di panẻn.

 

Di sisi pasawahan geus nungguan nu nitah derep nyaẻta Haji Imron, anu boga sawah panglegana di lembur Cimangantẻn mah. “Naha mani beurang datang tẻh mang?” Ceuk Haji Imron, paromana rada baeud sabab ti isuk geus di sawah nungguan nu rek derep ari nu derepna datang pabeubeurang.

 

“Hapunteun Juragan haji, nyuhunkeun ma’lumna da ari angkat mah ti bẻrẻs sholat subuh tadi tẻh, namung nya namina rombongan istri mapahna rada baroyot, kitu seun, mugia ulah janten bendu juragan haji.” Jawab Mang Tahrid nyebut ka haji Imron nya haji nya juragan supaya haji Imron henteu ambek.

 

“Heueuh geus teu nanaon, sok wẻ tah ti tungtung kotakan itu tuh belah kalẻr ẻta sawah kuring, tah dipanẻn tẻh tepi ka nu tungtung kidul. Pokona mah sakabẻh kotakan pinggir jalan ẻta boga kuring.” Ceuk haji Imron deui bari tutunjuk ka kalẻr jeung ka tungtung kidul.

 

“Sumangga, sumangga Juragan Haji, pasukan abdi siap ngalaksanakeun tugas.” Ceuk mang Tahrid bari rengkuh hormat. “Kuring rẻk ngaroris sawah blah wẻtan heula nya, aya nanaon mah susul wẻ ka wẻtan, atawa tungguan kẻ bada lohor kuring kadieu deui.” Ceuk haji Imron. “Sumuhun juragan haji.”

 

Haji Imron ngalẻos indit di baturan ku badẻgana. Mang Tahrid malik ka rombongan pok nyarita “Urang siap – siap di gawẻ, Bagian ngagebot dua urang Nyi Sarwiti jeung Jang Kẻmẻd nu sẻjẻnna ngarit parẻ.”

 

Teu kudu di parẻntah dua kali, Rombongan kabẻh geus apal kana tugasna sẻwang – sẻwangan, sabab buburuh derep tẻh lain ukur harita tapi mẻh unggal taun di lakonan. Geus matok milu ka rombongan Mang Tahrid, nya nu anyar tẻh ukur Nyi Sukẻsih, manẻhna mah kakarak harita milu derep ka sawah.

 

Harita gẻ Nyi Sukẻsih mah ukur ngajentul dina galengan, nempokeun nu sẻjẻnna anu sibuk ngarit tangkal parẻ ku ani ani. Ningali kitu mang Tahrid nyampeurkeun ka Nyi Sukẻsih. “Nyi Kẻsih, naha ngahuleng wae? Lain geura bantuan tuh nu lian ngarit parẻ!”

 

“Teu tiasa abdi mah mang.”

“teu tiasa kumaha ieu tẻh?”

“Enya teu tiasa ngarit parẻ.”

“Heueuh apal amang ge hidep mah kakarak milu. Sok wẻ kaitu turun ka sawah keun wẻ lalaunan bari di ajar mẻh bisa.”

 

Nyi Sukẻsih ẻlẻh dẻẻt manẻhna turun ka sawah lalaunan tuluy ngadeukeutan ma yayah anu ngarit pang sisina. “Sok tah ani anina Nyi, tah cara ngaritna turutan ema.” Ceuk ma Yayah bari nyontoan cara ngarit tangkal parẻ.

 

Song Ani ani di bikeun ka Nyi Sukẻsih, Ku Nyi Sukẻsih di tampanan. “Sok arit parẻna Nyi, ema mah rẻk mawa heula hasil ngarit ka Nyi Sarwiti supaya di gebot.” Ceuk ma yayah tuluy ngais parẻ meunang ngarit di bawa ka tempat ngagebot.

 

“Deuh aing nya merang nya aratel kieu, kaduhung milu, tadi tadi pura – pura nyeri beuteung baẻ supaya teu jadi milu.” Ceuk Nyi Sukẻsih nyarita sorangan bari gagaro leungeunna nu karasa ateul.

 

Nyi Sukẻsih lalaunan nyekelan tangkal parẻ, ani ani di heumbatkeun lalaunan. Kusabab ngaritna asa – asa atuh ani – ani tẻh jadi nyolẻdat, seuseukeut nurih kana leungeuna Nyi Sukẻsih. “Aduh, aduh, tulungan Ma!” Nyi Sukẻsih ngagero nahan kanyeri, getih ngucur tina tatu dina leungeun kẻncana.

 

Ma Yayah nu ngadẻngẻ anakna ngagero, gagancangan muru ka Nyi Kẻsih “Kunaon Nyai?” Ceuk ma Yayah hariweusweus. “Kakeureut Ma, duh mani nyeri.” Jawab Nyi Sukẻsih bari pupuringisan nahan kanyeri.

 

“Hayu kasisi heula Nyi.” Ma Yayah nuntun anakna ka sini sawah, gancang manẻhna mersihan tatu Nyi Sukẻsih ku cai asak meunang mekel ti imah. Sanggeus bersih Ma yayah ngala daun babadotan nu loba ngajejembrung sisi sawah tuluy di gayem, geus rada lembut daun babadotan tẻh di taplokeun kana tatu anakna.

 

Bẻrẻwẻk tungtung samping di soẻhkeun ku ma Yayah tuluy di pakẻ meungkeut tatu Nyi Kẻsih anu geus meunang mopokan daun babadotan. “Geus Nyai mah ulah waka digawẻ, ngiuhan wẻ heula di dieu, keun ema nu bẻbẻja ka Mang Tahrid mah.

 

Nyi Kẻsih ukur unggeuk, Ma Yayah jung nangtung terus leumoang ka tengah sawah nyampeurkeun mang Tahrid anu keur sibuk ngarit parẻ. Maksudna mah rẻk bẻbẻja yẻn Nyi Kẻsih moal waka bisa gawẻ sabab leungeunna tatu ka keureut ku ani – ani.

 

Nyi Sukẻsih ukur diuk ngahuleng di handapeun tangkal jambu bari ngararaseun kanyeri dina tatuna. Teu sadar ti kajauhan aya dua pasang panon anu ti mimiti rombongan datang gẻ geus nalingakeun ka dirina.

 

Dua urang jajaka diuk dina luhureun batu sisi walungan leutik teu jauh ti tempatna Nyi Sukẻsih reureuh. Nu saurang jajaka rupana lumayan gagah, buukna sataktak irungna bangir di papaẻs ku kumis ipis di luhureun biwirna anu rada galing. Jang Hẻndi ngaran ẻta jajaka tẻh. Anakna Bah Kanta kokolot lembur Cimangantẻn.

 

Ari nu saurang deui pangawakannana pendẻk busekel beungeutna bulẻd lamun nyarita sok di tungtungan ku ngahẻhẻh. Ngaranna Si Odoy sobat dalitna Jang Hẻndi sanajan umurna leuwih kolot ti Jang Hẻndi. Tapi ku sabab apẻt di imahna Bah Kanta, purah ditutah titah malah remenna mah ngendong di imah bah Kanta tẻh. Nya Si Odoy tẻh geus di aku baraya ku bah Kanta jeung Jang Hẻndi.

 

Ari ayana di pasawahan, sabab di titah ku bah Kanta sina ngaroris parẻ naha geus meujeuhna di panẻn atawa acan. Tapi ti saprak datang rombongan nu derep ti Citiis, teuing kunaon Jang Hẻndi jadi betah nongkrong di sisi walungan.

 

“Geus beurang Jang hayu ah urang mulang hẻhẻh hẻhẻh.” Ceuk Si Odoy teu poho bari ngahẻhẻh. “Kẻ keudeung deui kang masih betah yeuh, tah udud mah masih rẻa kang.” Tẻmbal Hẻndi bari ngusiwel kana saku bajuna ngasongkeun udud bako molẻ geus meunang ngalinting ku daun kawung aya kana opat lintingna.

 

“Tara ti sasari, betah di sisi walungan boa – boa kasambet jurig cai kitu hẻhẻh hẻhẻh atawa kagẻmbang ku itu nya hẻhẻhhẻh..” Ceuk Si Odoy bari nunjuk ka arah Nyi Sukẻsih anu keur diuk handapeun tangkal jambu.

 

“Ah nya betah wẻ kang diuk di dieu mah tiis.”

“Alah ulah sok kura – kura dalam perahu, titatadi gẻ ujang tẻh nyuekeun akang da nyawang baẻ ka belah ditu. Sampeurkeun ari naksir mah hẻhẻh hẻhẻh.”

 

“Ah ẻra kang, sieun teu resepeun manẻhna ka kuring, kẻ kalah malik ngẻwa deui ka kuring.”

“Alah mani ẻpẻs mẻẻr kawas lain lalaki baẻ, keun atuh akang nu nyampeurkeun, urang tanya saha ngarana jeung urang lembur mana, kẻ urang nganjang ka imahna jang hẻhẻh hẻhẻh..”

 

“Nya teu langkung akang ari kitu mah, da kuring mah teu nitah.”

“Enya teu nitah ngan hayang ngajurungkeun nya hẻhẻh hẻhẻh..”

Si Odoy nguniang hudang tuluy leumpang ngagandeuang ka arah Nyi Sukẻsih, leumpangna di gagah gagah bangun hayang ka puji. - Bersambung

Dongeng Hulu Iblis Nyi Sukesih Bagian 2  mp3/mp4 pencet di handap

Respons Bupati Majalengka Daerahna Janten Calon Ibu Kota Anyar Jawa Barat

 

Ki Dagar Blog - Respons Bupati Majalengka disebut-sebat barobah kaayaan salah sahiji wilayah anu bakal barobah kaayaan calon Ibu Kota anyar Propinsi Jawa Barat ku Gubernur Jabar Ridwan Kamil.

Teuing margi latah atawa saleresna atos dikonsep tebih-tebih dinten, wacana kasebat mendapat komentar rupa-rupa, kaasup Bupati Majalengka Karna Sobahi.

Naon wae waleran na patali rencana kasebat? yuk regep cariosan  katut.

1. Pemindahan Ibu Kota Jabar kaperluan nyedek

Akademisi Universitas Majalengka, Dr H Diding Bajuri MSI ngomong, pemindahan Ibu Kota propinsi sanes saukur ngiring trend rencana pemindahan Ibu Kota nagara, nanging leres-leres mangrupa kaperluan anu nyedek (urgent) kalawan alesan anu komprehensif sarta multi faktor.

Di sisi sanes, lamun wacana pemindahan Ibu Kota propinsi eta nyedek sarta mendapat persetujuan legislatif sarta komponen sarta elemen balarea Jawa Barat, mangka penentuan calon Ibu Kota anyar oge kedah dumasar kenging kajian anu serius, sarta multi dimensi, sanes semata panon didasarkeun dina posisi geografis, demografis sarta topografis.

“Namun langkung ti eta peryogi nimbang-nimbang aspek sanes, di antarana tanagi rojong anggaran pemindahan sarta pangwangunan sarana prasarana Ibu Kota propinsi sarta aksesibilitas transportasi sarta komunikasinya (darat, laut, udara.

Ku kituna tiasa ngarojong dina kelancaran tata damel sarta tata hubungan Ibu Kota propinsi kalawan sakumna wilayah kabupaten/kota di Propinsi Jawa Barat.

2. Kertajati Atos Pinuh

Bupati Majalengka, Karna Sobahi nanggepan wacana Pamarentah Propinsi kanggo pigawe pemindahan Ibu Kota Jawa Barat ka tilu wilayah pilihan, nyaeta Segitiga Rebana (Cirebon-Kertajati-Patimban), Walini Cikalongwetan, sarta Tegalluar Kabupaten Bandung.

Ceuk manehna, lamun ditingali ti rencana tata rohang wilayah (RTRW) sarta rencana rinci tata rohang (RDTR) kanggo Kertajati atos pinuh ku kituna kanggo wacana pemindahan Ibu Kota Jawa Barat eta henteu semudah anu dibayangkeun. Sumawonten, ceuk manehna, perpindahan eta ngait ka sababaraha perkawis anu kedah diperhatikeun, di antarana fasilitas tanagi rojong, personalita individu pagawe anu barobah kaayaan perdebatan paos.

“Henteu gampil pagawe-pagawe dipindahkeun, nyanghareupan eksodus-eksodus ka ditu, kudu nyiapkeun imah, gaji sarta sanes-lianna. Intina kedah diperhatikeun tiheula masalah-masalah eta” cenahna.

3. Naon alesan pemindahan Ibu Kota Jawa Barat

Karna sobahi oge nananyakeun perkawis naon anu barobah kaayaan faktor yen Ibu Kota bakal dipindahkeun. Sahenteuna, kepala wewengkon kedah terang sumawonten Majalengka barobah kaayaan salah sahiji wewengkon anu barobah kaayaan calon Ibu Kota anyar Propinsi Jabar.

“Abdi kedah teurang, mangka na antos abdi kedah ngobrol leuwih tiheula kalawan Ridwan Kamil, ulah dugi aya sanggem-sanggem sepertos ieu “lumpat ti masalah” cenahna.

4. Pindah Ibu Kota sami kalawan pindah masalah

Karna Sobahi nambahan, lamun saleresna Ibu Kota engkena bakal dipindahkeun ngan bade barobah kaayaan mindahkeun masalah.

Dirina oge nyebutkeun, Bandara Kertajati bade barobah kaayaan kapinunjulan ti Majalengka anu barobah kaayaan salah sahiji wewengkon calon ditujuna Ibu Kota anu anyar.

“Nanging kitu, rohang na aya henteu, soalna di RT RW rohang na eta atos mundel. Nanging, abdi angger ngarojong sarta membolehkeun lamun saleresna Ibukota Jabar bade dipindahkeun ka Majalengka” sanggem Karna.

Dicutat tina koran sunda

Hulu Iblis Nyi Sukesih Bagian ka 1

#Hulu Iblis Nyi Sukẻsih

Bagian 1

Karangan Ki Dagar

 

Pamandangan isuk – isuk di pilemburan kacida matak waasna. Pasawahan hẻjo ngẻmplok satungtung deuleu, manuk ting keleper ngepriskeun ibun tina jangjangna, tuluy disarada pada baturna.

 

Jalan arula – arileu mapaẻsan tonggong pasir, mun di sawang tikaanggangan mah kawas oray anu melit kana pasir. Pokona mah mun nyawang pamandangan di pilemburan matak betah poho ka waktu.

 

Aya hiji lembur anu katelahna Citiis. Citiis tẻh pernahna disuku gunung guntur.  Lembur anu kawilang lumayan gedẻ sabab loba pangeusina. Pakasaban urang lembur lolobana kana tani, aya anu kana nyawah sawarẻhna aya ogẻ anu kana palawija atawa ngebon bubuahan.

 

Ẻta gẻ aya sababaraha urang anu dagang, sẻsana mah tukang buburuh, nyakitu wẻ buburuh tani saperti macul, tandur, ngarambẻt, jeung derep diwaktu panẻn.

 

Di sisi lembur Citiis aya hiji imah anu rada mencil ti jajaran imah sẻjẻnna. Imah anu basajan pisan, wangunanna tina kai jeung bilik ari hateupna tina daun kiray. Pangeusi ẻta imah ukur duaan, duanana awẻwẻ.

 

Nu boga imah tẻh ngarana Ma Yayah ngaran aslina mah Sukiyah ngan urang lembur sok nyarebutna ma Yayah jadi wẻ nelah ma yayah. Ma Yayah tẻh randa nu ditinggal maot ku salakina. Boga anak geus gadis rumaja putri ngarana Sukẻsih.

 

Nyi Sukẻsih boga rupa geulis irungna bangir panonna cureuleuk buukna galing muntang, awakna jangkung lenjang. Di lembur Citiis mah Nyi Sukẻsih tẻh bẻntangna. Teu sirikna jajaka ngantri ngahẻroan Nyi Sukẻsih.

 

Hanjakalna Nyi Sukẻsih tẻh boga sifat sombong, pilihan, abong aing panggeulisna, sok ngahina kasasama. Ka Ma Yayah gẻ nu jadi indungna sok remen wani ngalawan. Kituna tẻh kusabab ku ma Yayah tileuleutik di ogo pisan. Maklum anak awẻwẻ hiji – hijina.

 

Kocapkeun harita Ma Yayah gegeroan ka Nyi Sukẻsih

“Kẻsih, kẻsih, Nyai kadieu heula anan!”

“Aya naon Ma?” Nyi kẻsih kaluar ti kamarna.

 

“Lain apanan isuk arẻk mangkat ka Cimangantẻn, hidep jadi ngilu?”

“Moal ngilu Kẻsih mah ma.”

“Hih naha kunaon moal jadi ngilu sagala?”

“Apanan ka Cimangantẻn tẻh niatna ngiring rombongan derep ma, ma  enya Kẻsih kudu ngilu buburuh derep atuh rusak kẻ kulit kẻsih caba arateul merang ma, moal aya jajaka anu resepeun deui atuh ma.” Ceuk Nyi Kẻsih bari bibirigidigan, ngabayangkeun dirina  milu buburuh derep cara batur.

 

“Aẻh, ulah kitu Nyai. Nyai tẻh geus gede ayeuna mah, geus sawawa, geus wancina di ajar gawẻ, tempo tuh batur nyai mah, Nyi Hindun, Nyi Marni jeung sarwiti mani geus palinter kana tandur, ngarambẻt somawona kana derep mah. Ari hidep can bisa nanaon katinggalen atuh ku batur.”

 

“Keun waẻ ma katinggaleun ku batur gẻ piragẻ pinter tandur, pinter ngarambẻt ieuh.”

“Ih penting pinter tandur pinter ngarambẻt tẻh nyai. Pan hiji waktu nyai bakal boga salaki. Kumaha lamun salaki tani ari pamajikan teu belul nandur apan ngẻrakeun meureun, can kẻ di hẻwaan ku mitoha ari cicing waẻ di imah mah.”

 

“Gampil atuh ma, kari nyiar salakina ulah ka jalma tani, atawa nyiar salakina ka jalma beunghar, jadi tandur jeung ngarambẻtna muruhkeun ka batur, tuh cara Bu haji Euis Pan ukur kari tutunjuk ka batur.”

 

“Ulah sok ngimpi luhur teuing ieuh, urang tẻh jalma teu boga, lain babad lain tanding kudu nyiar jodo jalma jegud kawas haji Sanusi mah atuh. Urang mah kudu bisa ngaragap awak.”

 

“Matak ẻta ma, kusabab Nyai rumasa jalma teu boga matakna pikeun ngaronjatkeun darajat hirup urang carana kudu nyiar salaki ka jalma beunghar, atawa anak jalma jegud ma.” Tẻmbal Nyi Sukẻsih teu euleum – euleum.

 

“Meunggeus ah, pokona mah isukan Nyai kudu milu ka Cimangantẻn titik.” Ceuk ma Yayah tandes. Teu nunggu jawaban anakna Ma Yayah langsung ngoloyong ka pawon rẻk nuluykeun pagawẻannana.

 

Nyi Sukẻsih ari geus dikitukeun ku indungna mah teu bisa majar kumaha. Manẻhna gẻ ngoloyong deui ka pangkẻngna lain mantuan ma yayah kuprak keprek di pawon.

 

“Keun baẻ ah itung – itung ulin wẻ ka cimangantẻn mah, da Si sarwiti jeung Si Marni gẻ marilu indit. Aing mah rẻk disisi sawah we lalajo. Keun wẻ ema nu derep mah.” Kitu gerentes hatẻna Nyi Sukẻsih bari asup ka kamarna. -bersambung

Dongeng MP3 MP4 Hulu Iblis Nyi Sukesih pencet di handap